優點:
AF好過大多入門機身
未玩過aps-c機身 可以咁close 拍攝主體
唔難用,容易上手, 開full auto 好似手機影相咁方便
影RAW+JPG, 拍攝後改變曝光, 玩濾鏡都得
鏡頭防震唔惹少,可比Olympus
拍攝video 仲有電子防震
缺點:
未見過有一個無反相機系統相機機身款式多過鏡頭。
畀多個轉盤我會開心啲。
電池續航力偏低兼無usb充電。
4k crop mode, 要拍4k之鏡要闊啲
新手用任何aps-c機身時可能會因景深太淺導致Out Focus,此需經驗及技巧搭救
覺得唔好用畀一星?咁你用返手機好過
評價:
M50 小弟第二部EOS M機身, 本人之前用開M10, 但後來嫌反應慢, 好快就轉售出去。 結果二手市場的m10已經迅速跌破四位數, 真係好彩當時賣出咗。
講返m50, 今次同女朋友去尖東Staycation,, 就係攞咗呢部機上陣。 唔好話我收咗canon錢, M50真係好好用, 全自動駕輕就熟, 智能場景選擇可靠, 高反差環境會提你開閃光燈 。
我呢啲半途出家嘅「器材腔」, 平時雖然成日買相機,但係乜都唔識出街都係用手機影相多。 所謂相機最多咪去旅行影兩三張相, 然後就會因朋友、親戚、女朋友想立刻將啲佳作放上facebook呃like叫我Instant Share。 咁你哋都知啦, 以前相機啲wi-fi係慢過隻蝸牛過一張相要8秒10秒, 唔通叫佢哋等我去廁所開大, 先send到相畀佢哋咩?M50就唔同啦, 打開wifi連接手機,一張相full size 8Mb 我落手機唔使兩秒鐘, 轉個頭就可以whatsapp Facebook Instagram 畀缺乏耐性嘅香港親友們。
最緊要嘅係, 呢部係一部智能相機, 場景選擇, 自動白平衡, 使唔使開閃光燈, 自動反差環境優化, 如果咁都影唔到靚相我諗你部智能手機都未必會影得到。 Yes,好多人或者會話大片幅嘅相機影出嚟嘅相唔一定靚啲,但APSC相機最大嘅優勢就係低光表現及動態範圍。就算上到ISO6400, 雜訊仍非一個大問題, 而動態範圍明顯比入門M43機身多。
如果硬係要講比較大片幅嘅相機有什麼缺點的話,我會話係景深控制, 尤其係用光圈F1.8的定焦時。 呢個小問題或者就需要靠經驗同埋技巧搭救, 尤其係使用22mm F2,32mm F1.4,Sigma 三劍,及55-250mm 時。 景深太淺呢個問題反而不太影響15-45 kit 18-55 kit, 11-22 wide及 28 Macro (非Marco時) 。
有師兄話M50比M5同M6講係較低端的body。 我不認同, 事實上幾部機性能非常類近 , 最大的分別只不過係電池續航力、連拍速度、及機身係金屬外殼而非塑膠外殼。其實睇番肥花二手價都知所謂較高端的M5及M6(一代), 機身市價錢雖高, 但係始終冇乜人接貨的籮底橙。
如果你係一個一般用家, 一個半專業用家,或者係經常拍片的Hybrid Shooter, 而最近又想轉相機, 我會非常建議考慮轉M50無有錯。 呢一部2018年出嘅相機絕對 滿速足到今時今日的攝影師需大多需要。
至於M100 同M200 我覺得轉嚟冇乜意思,雖然機身好細部, 但係功能少,無360度揭Mon,冇得快速連拍,無EVF, 平又係平得嗰幾百蚊,淨係呢幾點我已經唔會買。反觀最受歡迎的EOS M Body,今日唔係M50就係M6 Mark II;一部針對入門到進階vlogger用家, 一部則針對高階用家。
好今次Staycation影咗好多靚相, 讓我同至愛 種種回憶盡收眼簾。 由於我影相多過拍片, 拍片又純粹係為咗記錄生活, 所以有冇4k,4k有冇Crop對我嚟講毫無影響。 但係如果真係一定要影4k又擔心crop呢個問題, 咁立即買支11-22或Sigma 16 F1.4, 問題就迎刃而解無須擔心。