[hlcmarco]

古語有云:
勤有功,戲無益.
爭拗在口舌之爭,無害而無一利.
忍一時風平浪靜,退一步海闊天空.
做事雖無人見,良心知有天知;不求人神共鑑,但求無愧於心.

兒時父母親經常對我訓示:
只可睇人做,不可睇人食.
各有前因莫羨人,人家風光背後,你又可知其有幾多辛酸.

人,這個字,雖兩筆;寫雖易,行則難.
人,有兩樣事,是絕對公平.每個人都要死,每個人一天都只得二十四小時.
就看你如何善用時間,如何演繹人生.
人,可以平平淡淡過一生,亦可以精彩無悔一生;至於如何取捨,就要睇閣下做化.

孩童時期,家境赤貧;課餘還要做很多手工藝去幫補計,有時要做到清晨才可以休息.
自問本人資質有限,所以要想做好一點,就要付出比別人數倍的努力.
但有一樣天賦,異於常人,可算是上天對本人不薄.
這種天賦,就是我的意志,有無比毅力,不怕苦,不怕艱辛,不怕勞累.
而且我的睡眠質素至今亦奇高,小睡三至四小時,就可以應付繁重的通宵達旦的工作.
更甚者,有時我根本唔使點瞓,我太太和兒子,曾經懷疑過我是否人類!但現在以經見慣不怪了.
但我兒並未能遺傳這份天賦,略感遺憾.但十人生九品,天生我才必有用,他總有他日後的生活方式.

一生貪財,但從不習賭;我深信,錢是取於正途,方可久享.
搵得嚟就要使得去,我最怕人在天堂,錢在銀行.
當然,我自己都有買左兩份人壽和意外保險,萬一我真係三長兩短,我妻子亦有所依靠,不至孤苦無依.

我跟太太是財政獨立,我太太鍾意股票,我鍾意攝影,所以,我太太從不過問我買攝材.
就例如我買了部D3s,佢只不過是見到就順口問聲,又買左部新機玩呀?
我就順口答佢,係呀,妳最近又入左邊隻股票呀?佢就即時彈開.

每個人心中都有一把尺,這把尺,可以量人,亦可量己.
而這把尺,就是那個人的值價觀,認知性,認受性和能耐的數值.
在同一間學校的同一個班別,同一眾學子.在相同的學習環境中,
點解有學生可以考第一,點解有學生考第尾,總可令人有所反思.
試問問考第一和考第尾的學生,問佢地對老師授課的體會,竟然存在極大的差異.
考第一的學生會話:上堂當然要留心啦,老師教得幾好,回家再多加溫習,就會更加明白老師先前所教的課程內容,
然後再做預習備課,咁明天在上課的時候,可以更加容易明白老師的教導.
又試問下考第尾的學生,佢會話:嗰條磨碌都上堂唔知佢0翕乜春,簡直係浪費我啲時間,邊有心機聽呀?,
不如諗下周遊列國,又或者諗下放學去邊度威好過啦.溫習?邊度使呀!上課聽完就算,學得幾多得幾多啦.
功課交唔交,老師都唔會理,要理又點呀?我唔交佢都吹我唔漲.
預習備課?乜嘢嚟呀?預先溫習做準備?使唔使咁認真呀?咪玩啦.
預先溫習做準備完,我重要上課嚟做乜?邊有時間做埋呢啲無謂嘢,有時間都同啲老死出街趁下好過啦.

表面上,呢兩個學生係在相同的學習環境中學習,但分別就係課餘背後的用功和玩樂.
差別就是這樣衍生出來的.
所以有話:人比人,比死人;若要人似我,除非兩個我.

攝影亦然,有人會好介懷個快門次數,原來佢話快門次數多,個易手價都會冇咁好.
有人會話好愛錫啲鏡頭,人多唔行埋去,怕整花左支鏡,一來唔靚,二來他日較難出到手,而且容易被壓價.
佢地由買相機鏡頭嗰日開始,就只係諗住個易手價,都唔諗下點樣可以影好啲相.
更甚者,佢地有冇諗過,其實唔使太專業,一樣可以拎住相機幫人影下宴會酒席,賺取少少外快,當幫補下攝材都好呀.

到我這樣的一把年紀,宴會酒席就去得多,老細都識唔少.
但係點樣至可以發到圍呢?點樣可以令人家會搵你影相呢?呢啲就係一種學問.
宴會酒席就去得多,自然見到好多攝影師,我雖然是坐在吃,但對眼就留意下佢地用乜嘢器材.
又留意下佢地點走位,特別是在敬酒的時候,佢地總是走在有利的位置上.
久病成醫,睇得多,自自然然都偷到啲師啦.過多幾次用心學習,就膽粗粗的在冇攝影師的宴會上試下自己動手影.
知易行難,開始的時候,總是走位差了一點,經常跟唔上,總是走唔到好位.
原來走位是要先知先覺,唔係睇住個客嚟走位,而係要走定個好位等個客埋嚟.

經過多次經驗的累積,經過失敗中汲取教訓,慢慢就開始叫做得心應手.
蝕本生意冇人肯做,但我份人就最唔怕蝕底.
開始幫老細正式影宴會酒席相,我分毫不收,重做埋光碟送畀佢.
叫佢講下我影成點,啱唔啱心水,集思廣益,缺點有則改之,冇則就更加努力練習.
又再經過多次的實戰,老細好滿意,重叫佢啲老細朋友嚟介紹畀我識.
咁就多左搵外快的機會啦.

講真話,啲客開頭係幾介意攝材的級數,無他嘅,先敬羅衣後敬人.
想搵外快就當然要落少少本,當投資都要啦.
買下買下,搵到又再買下買下,結果至會買到我這套攝材.
我這套攝材都係好普通,所以我唔會去影結婚相,因為我懂量喉吞骨,亦有自知之明,無謂誤人大事.
所以我只會影啲宴會、團拜相、團年飯局、開年飯局和滿月酒席呢一類壓力冇咁高的工作.
況且,我日頭份工,人工亦唔少,請一日假去影結婚相,都唔係多好多,計落冇數圍.

而我影嗰啲宴會酒席相,大多數都係晚上收工時間去,我只不過是推左通宵班的工作,有時又唔係晚晚有工開.
起碼賺多左,重可以有得返屋企瞓,計落除笨有精啦.

我去花展影相,當功課咁練習,練反應,練眼到機到.
你估真係好似啲影友咁,放定腳架,用埋線控,左度右度至影到一幅相.
在宴會酒席上,爭分奪秒,影唔到就影唔到,根本就冇時間畀你考慮,全部係自然反應.
手持瞬間拍攝上的能耐,不是一朝一夕間可以練成,要日積月累的艱苦實戰.
負重磅拍攝,是要練好手力和腳骨力,練走位.
三機掛在頸項上,是要練習判斷、選材和取機的反應.
三機同時掛在頸項上,少啲頸骨力都唔得.
重有,三機同時掛在頸上,撞機撞鏡經常發生,全新的D3s已有很多地方撞花了,
啲鏡頭個遮光罩,簡直係好似戰地記者啲攝材咁,滿佈花痕.
有得著,就要有所付出,等價交換而已;他日賺到的,就可以另購新機新鏡.
舊機舊鏡就讓它們退役,我唔會賣走佢地,就讓它給仔仔當後備機吧.
易手買賣,我唔係咁慣,一來因為用開有感情,二來我最怕睇啲買家的嘴臉.
一萬幾千,只不過是過眼雲煙,我唔係窮到要賣走昔日的老拍檔去糊口.

在討論區發貼,只不過是悶悶地練下打字,唔啱睇、唔啱聽就笑一笑算數,就當我痴人說夢吧.
在C記討論區以平常心發貼,招來無理性的回貼,我唔會嬲,夏蟲豈可以語冰,子非魚,又焉知魚之樂呢?

[亞典波羅]

marco 兄, 過來人來講, 呢D好平常, 除非唔係網上玩囉.

越認真你越輸.

[amaze8]

great sharing! enjoying reading every word.

[tam_dominic]

人云亦云
莊周夢蝶
疑幻似真

Happy shooting !

[hlcmarco]

亞典波羅師兄,
我由1995年玩bbs和討論區,直至今時今日,幾多風雨未見過呢?
當年年少氣盛,口誅筆伐,以一人力敵十多人在網上罵戰.
可幸的是我用倉頡,佢地用手寫板,罵戰持續接近一個月,現在諗返起都覺無聊.

現在的我,對無理性的謾罵,我視作等閒,睇完笑一笑,我唔會上心,亦極少回貼.
今日上網發貼,只不過是因為今晚唔使返通宵班,無無聊聊就當練下打字而已.
C區的iso100000000師兄,接近"神"級,以前玩到炸板,被系統管理員停了戶口,
現在只不過又用新戶口入嚟興風作浪.

[goldfish0606]

朋友試過話我用D300 , 好似強姦個快門咁 >_<

[kit0901m]

朋友試過話我用D300 , 好似強姦個快門咁 >_<


好貼切 ^++++++++++^!


D300快門好似壓彈簧，不是很習慣



我未買D300S前看過不少文章

有人說無底深潭 ＠＠

有人很習慣

[亞典波羅]

>> 可幸的是我用倉頡,佢地用手寫板

我都係倉頡, 亦都唔停咁打, 眼不離 mon, 手僅打字, 不過唔知有冇100字咁多, 呢種唔停咁打的聲音好悅耳.

[hlcmarco]

亞典波羅師兄:
有次我深夜打字趕交報告,我仔仔瞓瞓下都彈起左身,
佢竟然同我講:爸爸,你打字啲聲音,好急促,令人好不安.

我都覺得打字啲聲音好悅耳,講真的,我打壞了好多個鍵盤.
我以前用大機,買鍵盤好揀擇,七百多元的IBM101鍵盤我都買過.
結果都被我打壞左,無他的,因為我實在打得太多太多字了.
微軟的自然鍵盤開始的時候算係好打,但係打得多,一用返啲普通鍵盤,
啲指位經常按錯,幸好佢唔係咁耐用,否則延禍至今,要修正就為時以晚了.

現在反而用了手提電腦,個鍵盤反而耐用左,我呢部筆電都用左七年有多了.
鍵盤啲按鍵,被我打到凹了下去.
有時我帶部筆電返公司,啲同事見到我部筆電,都好好奇咁問我,
點解你個筆電鍵盤啲按鍵,好似有少少凹了下去咁樣,係唔係我眼花呀?

題多話,原來打得字多,除了可以打到個鍵盤凹了下去之外,
我啲手指紋重愈來愈淺,過關行E通道,個指紋閱讀器好多時都讀唔到找啲指紋.
每次都要用水整濕少少,做個較強的反差,佢至比較容易讀到,都唔知係好事定壞事.

d2°c師姐:
素來都知d2°c師姐打字速度奇高,小弟亦難以望其汗背,
我暫時還未能跟師姐有得揮,師姐太過抬舉小弟了.

[亞典波羅]

打字可以當綀琴, 唔駛死打爛打, 輕輕鬆鬆打啦試下.

[hlcmarco]

亞典波羅師兄:
我打字係當練習,況且我日日都有好多報告要打.
我而家一路上網回貼,一路亦做緊功課.
我明白可以輕輕鬆鬆咁打,但係做唔起啲報告明天交.
雖然老細唔會鬧,但我平時交到足報告,一交唔到,我個心唔係咁舒服.

早前去花展,我仔仔買左支24-70mm f/2.8,我點解冇拎去影,
就係因為支鏡唔係我買而係我仔仔買,我唔忍心令佢支鏡受損.
三機掛頸,左碰右撞,損傷自然難以避免,所以至唔敢令我仔仔傷心.

買左部D3s的時候,我叫仔仔多啲拎部機出街用,佢因為部機太貴太新,
怕整花左,會被我責難,而家我都撞花左部機身好多處了,
仔仔睇到肉都赤埋,但係佢現在用起上嚟就唔使咁驚.
我反而覺得係一件好事.

[hlcmarco]

d2°c師姐:
我以前亦曾經用過UNIX,SOLARIS和LUNIX操作系統.
但妳之前回貼,講妳係小朋友,窮過我,冇咁多錢打爛個鍵盤再買過.
而家又話1980年已經用UNIX上新聞組,
咁妳年紀都唔少喎,分分鐘都係啲六十後,咁豈非同我差不多年紀?
抑或妳現在疲勞過度,有少少言不由衷呀?

[hlcmarco]

d2°c師姐:
唔係呀?咁都叫虐兒!
我冇錢請菲傭呀!
鍾意影相就唔好怕重.
我仔仔只不過係比較鍾意影120菲林大底片雙鏡相機,
即係佢自己買的上海四型中片幅菲林機.
我都唔明白,好好地有數碼機唔用,用部連測光都冇嘅老爺菲林機.
小朋友的所思所想,我地啲老一輩,有時都好難會明白.

[hlcmarco]

看來真係要休息了,功課剛做完,有點累.
竟然可以老眼昏花到將LINUX寫成LUNIX,
我以前用的是RED HAT LINUX.
我以前亦擁有過兩部Sun Microsystems,行UNIX,用磁帶做BACKUP.
跟住就用埋SOLARIS,可以在PC或筆電中運行,用來當伺服器.

[hlcmarco]

tam_dominic師兄:
不好意思,竟然走漏了眼,忘了回貼回應你所贈言.
好一句:莊周夢蝶

《莊周夢蝶》原文
昔者莊周夢為胡蝶,栩栩然胡蝶也.自喻適志與!不知周也.
俄然覺,則蘧蘧然周也.不知周之夢為胡蝶與?胡蝶之夢為周與?
周與胡蝶,則必有分矣.此之謂物化.

《莊周夢蝶》大意
有一天莊子夢見自己是一隻蝴蝶,他拍一拍翅膀,果然飛起來了.
他好開心喔!這時候根本就忘了自己是莊周.
過了不久他醒過來了,才驚覺到原來是一場夢!
究竟是莊周做夢變成蝴蝶呢?還是蝴蝶做夢變成了莊周呢?
莊周與蝴蝶有分別嗎?這才是物我兩忘、萬物化而為一.

《莊周夢蝶》意涵
人生不就是一場大夢嗎?在夢中醒、在夢中睡,在夢中悲歡離合…….
若能觀人生如夢,則是非、人我……皆如夢中事,何須夢中占夢?
看破、則視死生如夢覺,物我兩忘、方能大而化之,與萬物化而為一啊!

閱畢,獲益良多,確實值得我反思反思再反思.

天才白痴夢 - 許冠傑
曲︰許冠傑
詞︰許冠傑／薛志雄

人皆尋夢,夢裡不分西東;片刻春風得意,未知景物矇矓.
人生如夢,夢裡輾轉吉凶;尋樂不堪苦困,未識苦與樂同.
天造之才,皆有其用;振翅高飛,無須在夢中.
南柯長夢,夢裡不知所中;醉翁他朝醒覺,是否跨鳳成龍.
天造之才,皆有其用;振翅高飛,無須在夢中.
何必尋夢,夢裡甘苦皆空;勸君珍惜此際,自當欣慰無窮,何必尋夢!