[kk666]

..........................政客癱瘓立會 遲早票債票償

香港呢排唔知交上乜嘢惡運，佔領行動死唔斷氣，經濟民生大受打擊，咁仲唔止，政治爭拗由街頭蔓延到議事堂，反對派政客唯恐天下不亂，大搞不合作運動，結果大量議案堆積如山，唔知點收科。

嗱，尋日立法會工務小組委員會開會，財經事務及庫務局官員係咁講嘅，受議員拉布影響，有二十一項上年度已提交立法會嘅政府工程至今仍然未表決，甚至連傾都未傾，每項工程平均延誤六個月，導致預算成本暴增十億元。

當中嘅香港佛教醫院翻新工程標書，因為有效期已於八月屆滿，政府需要重新招標，唔知拖到何年何月。反對派盲目拉布，置病人福祉於不顧，點止敗家咁簡單，簡直害人害物吖。

被拖延嘅工程又點止咁少吖，連同去年嗰二十一項工程，本年度共有八十九個項目提交立法會審議，包括中部水域人工島策略研究、啟德發展計劃區域供冷系統及前跑道南面發展項目基礎設施等等，全部都係十萬火急。家陣一延俱延，一誤俱誤，成本唔知又要暴增幾多倍咯，最後咪又係由納稅人埋單。

最難頂嘅係，反對派惡人先告狀，竟然話政府一直壟斷議程排序，不合作運動就係要反傳統，掉番轉頭要政府聽議員支笛，由議員話事傾邊樣先喎，直頭奪權喇。

有議員仲惺惺作態，去信小組主席，要求政府優先處理爭議性較低嘅項目。喂，喺反對派眼中，凡政府提出嘅都要反對，凡建制派叫好嘅都要阻止，有邊項議題冇爭議先？根本就係做騷。

好似尋日咁，反對派淨係爭拗議程排序，已經佔去大部分時間，口水多過浪花，邊係做正經嘢吖。最慘嘅係，上次反對派突襲得米，工務小組及人事編制小組都由佢哋把持，拉布沒完沒了，政府工程運　作及人事安排勢必癱瘓。難怪政府官員私下慨嘆，反對派喺立法會嘅破壞力比示威者街頭佔領更大，一啲冇誇張o架。

唉，立法會嘅亂象只係開始咋，「好戲」在後頭，好似三堆一爐、在職貧困家庭津貼、公務員加薪等「戲肉」，肯定又會成為反對派騎劫議會嘅籌碼，最終受害嘅又係市民，香港有乜辦法唔沉淪吖。

咪話太一叮唔提醒，多行不義必自斃，反對派不務正業，搞風搞雨，以亂港為己任，遲早自食惡果嘅咋。市民眼睛係雪亮嘅，下次立法會選舉，就係呢班垃圾議員嘅末日，叮！

.

[kingkonghk]

朕1向刀5去頭票