[eric10101234]

轉貼手機維修課程 黑店 長沙灣 HPC IT Education Center 2





上次我講咗係呢間 Hpc it 學校讀手機維修課程基本經過，今次會講呢間學校聲稱嘅師資到底有冇資格教你手機維修...

課程基本主教
現時課程基本主教為(馬生、kin sir)，全個課程近九成時間都係由馬生教，主要教理論同實戰，而kin sir係教軟件同裝拆。

1.)馬生 (Alex Ma) - 北大電子畢業，精通電子，多年手機維修教學經驗。(網站聲稱)

呢點我哋從來冇質疑(北大電子畢業)呢個資格，但係實際表現可唔可以去教學呢？

馬生係北大電子畢業起碼超過三十年，而電子科技係(日新月異)，你遲一日學可能都會俾人淘汰，佢教學過時只講理論全無實戰能力，佢嗰套已經跟唔到現時水平，用過時嘅技術去維修現今手機真係可以做到？而且馬生極其量只可以話佢係一個電工，佢唔係一個手機維修師傅，佢係唔識維修任何手機，我班同學亦帶過多部有問題手機返去維修，結果冇一部可以成功維修好，而且發現馬生教嘅方法好多都係錯又或者係過時網上資料，就連最基本焊尾插都教錯方法，已經可以確定馬生係唔可能教人維修手機！

2.)馮生 (Kin Sir) - 多年教學和手機維修經驗。(網站聲稱)

基本上只有四堂由佢教，佢會教你(解鎖、JB、ROOT、刷Rom等等…)手機軟件上問題，同裝拆iphone4及samsung s2呢兩部手機。

kin sir 馮生嘅堂基本上只需要用兩堂就可以上完，佢教你嘅嘢只要你上網搵都會搵到答案，根本就唔需要用四堂時間去話你知點上網搵資料，學校呢個安排根本就係浪費大家時間，而我亦從未見過 kin sir 係鋪有真正維修過手機，師資專業資格亦成疑！

至於裝拆呢啲過氣機王，係咪咁就等於可以拆到(iphone5、5s、5c、6、6+、s3、s4、s5、s6、note3、note4)之後進出嘅機種呢！答案係你無可能會拆得掂之後嘅機！(但係呢間學校嘅邏輯係可以。)

3.)學校校長元校長：一個全無誠信同滿口大話嘅人，係講座話會教你維修最新型號手機，又話學識維修手機之後就可以入行(到大公司就業或開鋪創業)月入五萬不是夢，又承諾會用學校所有資源及任何可行嘅方式去支援你確保你一定學識，但事實係到你交晒學費之後，佢會用任何借口去推你嘅要求，話呢樣唔得嗰樣行唔通，學費唔包教你呢樣連換過份notes佢都會推你要求，話搵幾萬蚊個月但事實係連九千蚊都無人請！ 而且元校長好多聲稱都只係佢單方面講，從來提供唔到實際數據，如(學生會有好多機構聘請，有學生係手機廠外判商就業，好多人學得識呀！)


元校長最後重要反轉朱豬肚咁同我哋講：如果你哋到最後都係唔滿意嘅，你哋可以去消委會告我，我哋唔會再有任何安排同回應。呢個重係唔係一個作為教學者應有嘅態度。 (如果去消委會投訴係有用嘅，就唔會有咁多黑店昆水啦！)

就連考試都兒戲過人，考BGA焊晶片(將晶片焊返落部機唔著都有分，植珠靚一樣有分加)，結果我考試有八十分，合格分數但係部機唔著嘅(手術成功不過病人死亡)俾你考到一千分都無用，分數同能力唔比成正比，根本無能力出去搵工，就連監考嗰個人只係咩都唔識嘅人，根本只係一場(自欺欺人)嘅考試。


下次我會講呢間學校所聲稱嘅資格有幾多係真。

以上資料不定期更新。