優點:
1. 平,水貨千頭,行貨貴五舊不過個人覺呢個價錢得畀多40%買保養無乜謂。
2. Superzoom 鏡嚟講超輕同細支。
3. Tamron例牌包埋遮光罩。
4. 自動對焦算好快同靜,前提係要夠光。
5. 有Weather seal。
6. 有防手震。
缺點:
1. 膠,不過唔膠就唔會呢個價同呢個重量,嫌佢膠真係有啲多餘。
2. 光圈細,不過又係呢個價錢我無要求,要super zoom又要恒定光圈起碼多幾倍價錢,鏡片又會多咗又無咁輕。
3. 越南製造並非日本,可能因為咁所以可以咁平。
評價:
本身有部FF主要做嘢用,平平哋買咗部D5300 body,無乜要求只係想出trip影吓相同平時拎出街影吓相。
我策略係買靚鏡就投資落FF度,反正APS-C機都可以用,不過FF鏡一定重,呢部APS-C主要用嚟玩樂,加上我又唔係咁聞相,所以想搵支平嘅天涯鏡,原本睇中Sigma支18-50 2.8-4.5有內變焦一千有找,不過我部機對唔到焦,退而求其次見到呢支又幾抵。
雖然係膠不過好有質感,唔會好似永諾果隻膠咁膠。變焦環好大順暢度都OK,加上佢有個lock可以lock住18mm唔會孭孭下跣咗出嚟,不過可能鏡新,暫時唔lock都無問題。
18-200嚟講佢真係超輕,夠光對焦好快,防手震都幾明顯,雖然無Nikon VR咁好。邊位都會有紫邊但係可以接受,光圈收到11就最sharp。
唯一真係缺點就係光圈細,一唔夠光就好難對焦,不過我有支FF嘅Nikon 50mm 1.4同另一支平嘢永諾30mm 2.0可補不足。玩樂機嚟講夠用。
我嘅意見係,如果好似我咁平平哋買支鏡平時影吓相唔想帶咁重拎去旅行呢支買得過。如果係主機平時經常用嘅鏡就唔好慳,二千幾可以買到支18-55左右嘅2.8恒定光圈鏡用途會大好多,除非你真係好需要zoom到200mm(而係Full frame機300mm了)。
咁嘅質素咁嘅價錢其實無咩好彈,傻瓜機都買唔到啦。