Mercedes-Benz CLA 45 AMG 4MATIC

- 外形有齊跑車元素
- 好力得來又慳油，大約行 11 l/km (60% 市區)
- 原裝跑喉「啪啪啪」聲好激
- 車架好硬淨，入彎指向性高
- 軚感靈敏
- AMG 專用制動卡鉗好好收
- on demand 四驅夠安全，出灣大腳比油唔容易甩
- 4門5座位夠實用

- 7速SPEEDSHIFT DCT半自動波箱反應唔夠快
- 避震偏硬 (不過都係正宗跑車特色)
- 引擎無乜聲
- 有D turbo lag
- B柱有D前, cut線要擰多D頭望清楚D

之前座駕係 987 Cayman S，雖然話買架跑車本身預左用黎玩，本身仲有架7人車做腳車。但係 Cayman S 得兩個位對我黎講係好少用得著，得返工放工少少路程會用，一旦要載多兩位同事出去開會做野，又要用返架7人車，所以就打算換返架可以坐多幾個人既跑車喇。

我 14 年訂 CLA 45，15 年中要攞車，足足等左13個月，真係要好有耐性，不過都證明左呢部車好受歡迎。比起 A45，CLA45 多左個尾，個人覺得大方得體少少啦，不過個樣都係好chok好惡。比起純coupe跑車，屬於四門房跑既CLA45個重心係高左少少既，但車架真係硬到好似coupe咁，個軚擰少少，車架即刻有反應，操控上係幾好既。喺安全既地方熄左ESP試過佢既limit，四驅既CLA45唔係咁容易甩，而甩起上來，車尾向外走既情況都幾線性同受控，可以話快得黎幾安全，安全得黎又有玩味。

本身架車唔多跑長途，但係超慳油既表現真係值得一讚，360匹既車，油耗同普通2公升NA車差唔多。當然佢本身真係2公升4汽缸engine黎既，提升轉數既順滑程度係同6汽缸既引擎係有D分別，而且去到6500轉就紅區，轉波係要密返D。好在佢轉波時會比返D好激既排氣聲你聽，所以我都好鍾意轉下波，但要S/M mode先有聲，C mode就無喇。

CLA45遠睇似一部普通房車，街上面既其他司機一般都無乜為意。以前開Cayman S時，前面既的士、私家車喺倒後鏡望到你走埋黎，有唔少會自己入返慢線讓一讓，或者想cut線都會讓比你行先。開CLA45就無呢D待遇喇，路面有少少多車時都要就住黎比油，因為其他司機唔知呢部車有360匹，佢地唔會知你可以突然喺老遠走到埋黎佢地隔離，開太快會令佢地反應唔切。