其實俾120相機用嘅135菲林轉接器而家應該會好平，
講緊可能二，三十蚊已經有四粒用3D打印出嚟嘅塑膠轉接器，
究竟係咩心態驅使我要搞咁多嘢先影到闊景相？
菲林最好玩嘅地方就係好實在咁樣處理緊一啲實物去製造影像。
裏面好多嘅部份都需要我哋將創意利用實物轉化成為畫面上嘅效果。
呢種可能係數碼相機未必咁容易體驗到嘅過程。純粹買幾粒組件返嚟係會好方便，
但係自己係個過程上面嘅參與就會少咗。
咁樣輯相對自己嘅意義亦都唔太大~
今次嘅實驗其實好簡單，就係將一卷135菲林塞入去120嘅菲林軸心，
咁理論上只要擺啱位佢應該可以達到影闊景相嘅效果。。。。。。
第一個步驟需要度一度尺寸，計一計上下需要預留幾多尺寸先至令到筒菲林留喺個框嘅中間。
然後就直接用鋸鋸出配件嘅形狀，除咗要撐得住卷菲林之外。
另外喺形狀上需要預一個凹槽去卡緊135菲林個頂同埋底。
之後就係要搵返包住120菲林嗰張紙，或者求其一張紙，剪出120菲林片頭嘅形狀，
然之後將135菲林粘貼喺中間。咁就可以保證菲林對稱咁過片同曝光。
相比起喺普通135相機上面拍全景，通常係用遮光板嘅形式遮蓋菲林上下部份黎到營造闊景效果，
好處係快速多一個功能可以影到全景相。
唔好嘅係佢用唔盡整格菲林，
而且遮閉嘅效果實際上返到去用電腦硬加兩條黑邊都可以做到，所以唔係好吸引。
但係而家呢個方法，就係用盡整格菲林，
連佢唔預期俾你影嘅位置都用埋嚟影，夠晒抵玩。哈哈哈~
今次嘅實驗係用我啱啱整返好佢漏光嘅RZ67去拍攝~
用呢個方法可以用到好多120冇嘅菲林，玩多好多唔同菲林嘅選擇。
而最吸引人嘅除咗令你可以將本身嘅120相機體驗到影闊景相之外，
佢仲要連齒孔都可以影埋。呢個組合真係不得了！
如果覺得出埋齒孔太累贅嘅話丿可以直接掃描成為1:2.7電影比例相片
因為用嘅菲林唔同咗所以取景窗嘅比例都要自己去留意更改，
最簡單嘅方法就係用咭紙剪出菲林闊度嘅窿嘅遮罩。擺喺對焦屏上面方便自己構圖。
事關影到呢個闊度同你呢影像質素嘅闊景相機係我印象裏面，應該要去到哈蘇嘅XPan。
但係而家你只需要運用你嘅創意連蔗渣嘅價錢都唔使，
就可以用本身有嘅120相機體驗唔到嗰種闊度，呢種畫面嘅比例感覺好特別。
做咁多嘢，又鋸又剪又貼先影到幾張相，有人可能覺得自己捉蟲冇嘢搵嘢搞。
相比起今日資源豐富又急速嘅節奏，樣樣野都用資源解決，過程裏面少咗好多意義。
我自己覺得呢一種需要耐性又慢落嚟嘅創作過程係我對今日急速節奏嘅一種回應。
慢曝人生
慢曝人生。導人向毒
與有格局的人分享有格調的底片人生
IG: https://www.instagram.com/hkbillyszeto/
