[hlcmarco]

光陰似箭,日月如梭;轉眼間,計劃經年的四川貢嘎山海螺溝和四姑娘山八天之旅,現已進入倒數階段.
日間的工作,已悉數推辭,正式休養生息,讓身心可以回復狀態.唯獨通宵班尚餘下今明兩晚工作.
第三份工作,已把手頭上所有工作做好,亦已知會老細,一切順利.

攝材已執拾妥當,並且做好清潔程序,亦已過磅,今回總重少於三十磅,較平時四十磅輕可了不少.
今回出動五機四鏡一外閃,機動性強,遠交近攻,亦可手到拿來.

數碼相機五部:D3s, 7D連直度, D90連直度, SX1, S90配潛水殼.
變焦鏡四支:Nikon AF-S DX NIKKOR 10-24mm f/3.5-4.5G ED, Nikon AF-S NIKKOR 24-70mm f/2.8G ED,
Nikon AF-S DX NIKKOR 18-105mm f/3.5-5.6G ED VR, EF 70-200mm f/4L IS USM.
閃光燈一支:Nikon Speedlight SB-900.

雜項包括:
DD PRO 低通濾鏡吸塵機一部,氣泵一個,鏡頭筆一支,77MM HOYA PRO 1 CPL 一塊,微型腳架一支.
萬富圖679B單腳一支,單鏡相機雨衣一件,頭戴式兩傘一把,防曬防 UV 漁夫帽連前後遮掩布一套.

日間拍攝:D90配支10-24mm拍超廣角風景,D3s配24-70mm拍中距,7D配支小小白IS拍遠距.

晚間拍攝:就交由黑夜之神D3s和有f/2.0大光圈DC的S90把關.

超遠距拍攝:使用擁有20倍光學變焦的SX1,4:3比例28-560mm,16:9比例29-580mm.

微雨拍攝:則由擁有防塵防水滴的D3s和7D處理,
鏡頭只用有防塵防水滴能力的Nikon AF-S NIKKOR 24-70mm f/2.8G ED,和EF 70-200mm f/4L IS USM.

大雨和冰點低溫下拍攝:就只可全權交由S90配潛水殼穩守最後防線.

做人始終是有兩手準備會是較為好一點,否則一旦某一兩部相機出了問題,就會手足無措,亂了陣腳.

今個星期六重要返通宵班,星期日一早收工,立即開車返家,拎齊裝備立即起程出發.
因為要搭中午機11:10-14:00,但要在08:40在機場集合,唯有上到飛機才正式休息.

現在係時間要出街買行山手杖,頭燈,暖包和乾糧,應付旅行所需.

[hlcmarco]

已執拾好的攝材,準備好今日早上七時出發:


參加現代中國旅行社,今早出發,因其他的旅行社沒有到四姑娘山的旅行團:


我下個月21號,又跟康泰旅行社出發到西藏高原旅行九天:

[henrylok]

期待ching靚相....

[hlcmarco]

我現在喺機場等候上機,旅行完畢,真係會認真考慮貼相呢個問題.
或者等我去埋西藏旅行先啦,都係唔好或者,我回來應該都會貼相的.
我份人坐言起行,昨天忙於執拾攝材,我都在百忙中抽空到太古城影LEGO.
其實影相係講心的,但心動倒不如身動.
又係老生常談的一句:
千里之行,始於足下;能行一步,千里能行.

[亞典波羅]

祝你旅途愉快, 最緊要注重安全.

[hlcmarco]

亞典波羅師兄:
尚有數分鐘就要入閘上機了.
我回來的時候,應該會貼相.
但係各位師兄都知道我打字又長氣,我怕我貼相貼出癮,咁就大件事.
咁我豈不是日貼夜貼,一貼就幾十幅幾十幅咁貼.
我喺FaceBook,我一本相簿都用盡200幅呢個額,我已放了數千幅上FaceBook了.
所以我至會咁怕貼相,因為我一貼開,唔知會唔會收唔到手的.
嘩,係時候入閘上機了,多謝你的祝福,我一定會平安歸來的,請放心!

[kit0901m]

旅途愉快!




^++++++++++^!

[hlcmarco]

呢回就真係不愉快囉!!!!!
我現在身處四川省xx市x星級xxxx,幸好有上網服務,可以報告我現在狀況.
出得貼,當然係有事發生啦,如果唔係,我都上咗床休息啦.
呢回就真係大大鑊.
話說昨日出發,一路都叫做順風順水,除左個領隊帶錯我哋上錯人哋部旅遊巴,
好彩及時發覺,換番部重衰多兩錢重,又殘又細部嘅旅遊巴之外,
行李都唔夠位放,要放到去尾排座位上.
唉!咁都唔理佢,點不知今日重大鑊!
今日一早起身出發,行成雅高速公路,經過茶馬古道石像拍攝一會後,
中途在烈羊背大橋旁邊的山野農俗苑食過午飯後,諗住可以正式由二郎山隧道入藏區,
就剛過了xxxxxx後,在xx縣公安局辦理登記手續入藏區,
竟然不獲接納,要原車全部人立即離開,公安沒有告知理由,只有從導遊口中得知,
"由於我哋喺香港人,現在xx有事情發生了,不得通行,海螺溝和四姑娘山不得進入."
全團人聽完之後嘩然,瞠目結舌.因為呢個團,最重要的兩個景點,竟然去唔到.
xxxxxxxxxxx只是我不便告知地點,因為我重喺四川,要注意人生安全,不能亂寫未經確認的消息.

現在個導遊就亂過亂世佳人,話改行程,去成都周邊地區玩,
唔係呀?我跟呢個係高原冰川極地旅行團喎,羽絨我都帶左兩件,紅景天藥物和暖包都買埋,
成都今日成33度,叫我喺成都周邊玩,我不如返香港玩重好啦.
領隊佢地幾識得保護自己呀,立即叫團友簽紙答允部份行程取消而需更改行程.
我幾大都唔簽,我話我係去冰川,唔係去峨嵋山和樂山大佛玩,呢兩度我已經去過.
我重話,我叫你煮齋,你煮咗狗肉,你唔係要我食呀?
佢唔夠我講,亦吹我唔漲,全團人只有我一個冇簽名.

結果就去左個乜鬼寫生勝地,上里小鎮,咁就戇居居又一日,
晚飯後導遊又話明天可以去海螺溝,但丹巴和四姑娘山就一定去唔到.
改埋啲不知所謂的行程重話要補錢,唔係呀?我都未叫你賠,你重要我補錢?
我暫時按兵不動,睇埋明天是否可以到海螺溝先算.

其實我真係好懷疑接團呢間旅行社個導遊,可能佢地有啲手續未辦妥,
只不過係巧立名目,找藉口掩飾公司的行政失誤,而又順手劏客.
明天上到海螺溝的話,嗰度係冇得上網,等我一有機會上網,再報狀況吧.

有關我心儀的四姑娘山嘅危險程度,可以按下面的連結得知:
東方日報探射燈:征雪山,步步殺機.

[hlcmarco]

唉!煩中有錯,連結現已修正過來.

有關我心儀的四姑娘山嘅危險程度,可以按下面的連結得知:
東方日報探射燈:征雪山,步步殺機.

[kit0901m]

以為發生什麼事大大鑊

去大陸旅遊平安回來就好了




^++++++++++++^!

[hlcmarco]

d2°c師兄:
溝女唔使一定要返大陸,我臨去四川前兩晚至溝完女,上賭船,海皇星,兩日一夜.

你去住太古城個LEGO展頂住癮先啦.
我5月1日返港,我一返港就第一時間去太古城影多次LEGO展.

其實我在4月23日影過一次,但我只係帶左部D3s、D90和S90去,
而鏡頭就只係帶得三支,一支10-24,一支24-70,一支18-105,
焦段太狹窄,下次我會帶1Ds和7D去,配135L、24-105L和小小白IS就會好影好多.

kit0901m師兄:
我重未平安返港呀!我現在重係身處四川,今日啲行程重係五五波,唔係一定去到海螺溝.
去唔到的話,就真係大失所望.
我想去四姑娘山,香港只得一間現代中國旅行社有辦呢個團.
我唔係貪平,貪平我自己就搭飛機去成都跟內埋旅行社啦,平好添喎.
人算就不如天算,非戰之罪,我都唔想.
好彩我下個月去西藏,係跟康泰旅行社,呢間唔會咁失水準,除左上次嘅不愉快事件之外.....

[ringomov]

祝你旅途愉快, 最緊要注重安全,期待ching靚相..... x2

[kit0901m]

hlcmarco


別想不愉快的事情了

旅遊嗎，也是放鬆，休息，充電

睡醒可能有新發現


晚安!




^++++++++++++^!

[hlcmarco]

ringomov師兄:
我而家就真係認真不愉快,處境重係危危乎!
四姑娘山的相就一定欠奉了,希望今日去到海螺溝啦,
否則就真係全軍覆沒.

好唔開心,點解會發生啲咁嘅事???????
我去過好多好多次旅行,從來都未試過咁十五十六嘅.
最多都係成唔到團,點解成到團,最重要的景點四姑娘山竟然唔畀入!
而海螺溝,都係試多次,未必有十足把握去到.
好迷茫..........

[ringomov]

不如意事十常八九，意外係遇計唔到，放鬆D，去旅行係尋開心....

平安係最重要.

keep on !