Tamron 28-200mm F2.8-5.6 Di III RXD

評測報告

實拍照片

- 上手好輕盈，配我新買的A7C各自500幾g，有相當唔錯的平衡。

- 28mm全開銳利，直頭可比A036(tamron 28-75mm 2.8)

- 光圈跌得慢，加上2.8起步，比起同級起碼大兩級光圈

- 中央成像當然係好，就算邊緣成像衰減亦唔明顯，要讚

- Tele端成像有驚喜，就算200mm全開都可用，利用其壓縮感臨急當住半枝人像鏡用都ok(當然光圈得5.6就將就下啦) 。 如果A7R系玩家就更正，apsc mode下二千幾萬像素的300mm，輕裝打個雀都仲得

- 錄影呼吸效應問題唔大

- 枝鏡係有明顯色散同紫邊問題。尤其陽光底下的紫邊，就算縮光圈都唔係好改善到(要靠lightroom)

- 對焦黎講同A036同一套系統，唔係慢，但一定冇G鏡唔快

- 收光圈改善質素係可以但冇恒定光圈鏡咁明顯，即是說支鏡下限唔差，但上限比起恒定鏡並唔會太高

- 膠就預左，但個塗層唔係好防刮

- 冇24mm 冇防震 係咪問題？下面再講

這些年，討論天涯鏡都背負住一d規條，例如

- 要得方便就唔預會有質素架啦
- 倍數愈高成像愈差呢個反比係不變定律
- 如果唔係點解大三元咁貴
- 你預tele端送俾你就算，唔需要有期望
- 高階玩家就梗係玩定焦

以上真理，我都信。十幾年前玩單反第一枝鏡就係搭sigma天涯鏡，係方便，但質素真係差，冇幾耐開始玩定焦，天涯鏡就一路都冇玩過。

直到近來買左A7C，大人指令一定要買變焦鏡，開首其實係心儀CP神鏡A036， 但揾review睇落發現有好多review都將騰龍28-200mm同A036比對，原來呢枝野的響外國鋒頭亦好勁攞好多獎，之後試鏡到依家用左一排果然無負美名，只係因為佢唔係恒定鏡冇A036當年咁震撼。

同A036的相比，唔係話A036唔好，佢響35-75mm焦段的2.8大光圈係28-200mm取代唔到的，但犧牲左呢呢段光圈，除左仲有本身9成實力之外， 換來有質素的75-200mm，呢個焦段影到的東西可以多太多，所以最後就揀左後者。

係，我係用一枝恒定鏡去同佢比。Sony枝24-240或同類變焦鏡，泊埋去，車尾燈都見唔到。
佢重新定義左天涯鏡，將上面講的那些"真理"拆得七零八落，又或者咁講，天涯鏡呢個名銜，委曲左佢。

好認同樓下師兄同網友所言，再作綜合評價，如果你唔鐘意天涯鏡呢個名，其實你可以用28-75mmf4+75-200mm f4-5.6兩支小三元，再另送28mm 2.8去定義佢。3樣野加埋只係一枝標準變焦小三元的重量，仲要5000蚊就買到，呢d就係所謂CP值的極致表現。

最後講最多人講由A036出世就開始講的"冇24mm"或"冇防震". 響我眼中呢d都唔係缺點，係一個等價交易，係一個換取機動性+輕便+大光圈+價錢的deal，如果你願意同呢個"魔鬼"make a deal，佢就唔可以被稱為缺憾。如果有防震枝鏡仲可能咁輕？又或者再講28mm滿足不了你的話，24mm也應該未必滿足到你呢~

最最後，呢支讓讓都叫做到90分的"魔鬼"鏡雖然有點菱角亦充滿妥協，但佢的方便輕便讓我放下了開始玩定焦以來對極致質素與散景追求的迷思，重拾最初響條街亂擰亂掃街乜野都影吓的快樂。

誠意推介俾好似我呢d步入攝影迷思期，但又好想重新出發的朋友仔。

1. SHARP, 28-70 MM 全開勁SHARP，SHARP 過SONY 24-70/4, 同24-105/4 同段差不多，去到105段輸少少, 但要放大先見到，135-200 其實幾OK
2. 光圈跌得慢，可以當係28-70/2.8-4 黎用, 105仲有F4.5 果下威威, 135得番F5, 但TELE END 有F5.6, 同級NIKON, CANON 同SONY 都係TAMRON 最高
3. 顏色係稍淡, 用於SONY 機身幾討好，反而個人覺得24-105發色過濃
4. 變控, 抗耀幾好, 雖然應該係數碼修正
5. 輕, 真係好輕，之前用SONY, 又大碌又重
6. 67mm filter, 成套FE Tamron 幾歸一
7. 超近對焦，頂得起半支macro 鏡，

1. 唔算快, 特別TELE END, 同段速度輸24-105 好多
2. 膠味濃
3. 個HOOD 真樣衰, 冇SP 系統既實在感
4. 價錢我覺得唔算平, 因為24-200 好平
5. 人人覺得唔滿意既28mm 起頭
6. 衰冇防震，單靠機身唔係幾夠用

我覺得SONY 24-200 係一支好好既天涯鏡, 我用左2年，轉左Tamron 28-200, 覺得每一方面都有過之而無不及。重量減磅, 細支左，光圈大左，大部份同段大左2/3 級，SHARP 左好多, 仲要係SHARP 到界手果隻。
對於冇左24mm, 我覺得問題不大, 但佢既體積體重同成像上既改善，絕對係明顯而且係重要既
一向以來用天涯鏡就唔好講成像, 在呢支身上唔成立, 天涯鏡因為佢而有新觀念。

呢支表面上對手係24-200, 但實際上，匹配成為24-105既對手。
高倍變焦，同級最近對焦，最佳成像，最大光圈，最細最輕，
絕對可以越級挑戰24-105/4

其他師兄已講

其他師兄已講

各焦段最大光圈分別是：
28mm f2.8
35mm f3.2
50mm f3.5
70mm f4
100mm f4.5
135mm f5
200mm f5.6
可以當標準小三元用，多出來的長焦段其實可以當係送！性價比極高！
對新手家長黎講，一支鏡有錦多焦段，影小朋友極之方便。
希望快啲可以去旅行，試下佢喇！

師兄講曬啦

夜盲症患者

2010年用第一支騰龍天涯鏡18-270，新手上路冇咩要求影到就得。後來發現天涯鏡變形勁，對焦慢，畫質差，逐漸就冇再用過呢類鏡頭，甚至變焦都好少用。十一年後，因為有仔有女，定焦構圖非常困難，因為小朋友係無定向地活動，於是入左28-200。宇宙第一支f2.8起頭嘅天涯鏡，畫質非常好，變形可以接受範圍，紫邊一般情況下唔多覺，對焦居然有驚喜，然後就愛上左呢支鏡頭。當一切都咁美好嘅時候，一次1881影夜景就發現左佢嘅大缺點(冇小朋友嘅人可以唔使理會)暗少少嘅環境之下佢好似盲左咁，開人面對焦嘅情況下都搵唔到個主體係邊，個對焦系統好似呆左咁定係度。撇除呢種環境影相，佢係一支非常好嘅鏡頭，二手4100蚊我覺得真系侮辱左佢，咁鬼平。

通常影人像要淺景深，用焦距/光圈 >= 25 就很不錯，例如 一般定焦 50mm 光圈2.0 就blur 得算明顯.

佢113mm 有f4.5 ，所以當半支人像

用a7rii 4200 萬像素，clear zoom x 1.3 再轉apsc x 1.5 = x1.95 都仲好ok......焦距 等於去到390mm，放大率 > 0.5x

除了ultra wide 比唔到，佢咩都比晒你

近乎無

唔係吹水，定焦有時都要收1 級，佢收同唔收都差無幾，一全開就差不多定焦級數.....暈低

輕身
方便
各方面都唔錯

成支鏡嘅造工同17-28、28-75、70-180一樣，唔知係好定唔好，不過玩咗2875有成年，同28-200二揀一個人會揀28-200，一方面自己唔鍾意28-75 f/2.8嘅散景，二來係香港街拍都係行遠D保持距離比較好。

買呢支鏡主要用於拍片，之前有Plan過買FE 24-105 & FE 70-200，不過呢兩支鏡二手價加埋都Over萬二蚊，28-200萬x永x價唔洗5300，而且騰龍作為Sony嘅“二奶仔”，騰龍鏡用於Sony機身時暗角同變形問題都處理得好好，係萬x永x試過對焦都滿意於是扑鎚買入。

Sony嘅FF機，高ISO表現都唔錯，所以小弟會當支鏡係24-70 f/4、70-200 f/5.6，甚至全程f/5.6咁用。至於用落嘅感覺係點？正如標題講嘅——感覺複雜。

得益於呢支鏡嘅輕便，拎出街用完全唔覺得有負擔，而且影足一日都唔覺得攰。不過當返屋企用電腦睇相睇片嘅時候，支鏡無論解像力、銳度、發色等方面其實都唔錯，但又未去到滿意嘅程度(不過Post IG綽綽有餘)。

所以呢支鏡真係只適合貪方便嘅人，因為佢最多都係畀人“都ok、幾好”嘅感覺(對小弟而言)，又或者手上有幾支好嘅定焦，買呢支用來看下門口。