優點:
1:可變頻率顯示屏
重點唔在於 120Hz,而係在於可變頻率,你其實唔係時時刻刻都需要維持 60 或者 120 Hz,蘋果會因應你嘅需要,自動提升或降低頻率,所以用 iPhone 煲劇同電影會明顯慳好多電。
2:A15 晶片效能比上代明顯提升
雖然一般人會話電話要咁快黎托咩,但對於成日用電話打機嘅人黎講,係幾重要,起碼依家無咩 Game 係 A15 推唔到最高特效同維持 60Hz,另外亦無咁熱,如果唔介意低效能少少嘅可以改省電模式,更加唔熱。
3:相機全面升級
相機今次升級明顯,例如主相機廣角鏡,影相雖然唔一定比 iPhone 12 Pro 有明顯改進,但拍片真係有好明顯提升,自問成日換機,iPhone 13 Pro 係我見過嘅所有電話入面,拍片最好嘅電話,無之一。
超廣角鏡終於有對焦(以前因為容易超焦距,基本上對焦需要會低啲啲,但依家有微距鏡之後,加埋對焦系統,可以影到好多以前 iPhone 影唔到嘅角度同構圖。
遠攝鏡唯一升級就係遠左,完。
4:電量提升明顯
上代 iPhone 12 Pro 電量普通,叫做可接受,但開左 5G 之後,啲電倒水咁倒,依家 iPhone 13 Pro 就有改進,基本上 iPhone 13 Pro 嘅續航力等於 12 Pro Max 水平,睇片更加唔洗講,可變頻率上面講左啦,當然我試過瘋狂轉 App 做野打新聞稿,不斷同步資訊下,7 個鐘就 ko 部機啲電。。。所以重度用家可以買個 MagSafe 電旁身。
缺點:
1:M 字額縮細 但體驗更差
其實 Apple 係唔係唔知道佢個 M 額最礙眼嘅,唔係寬度而係厚度呢?佢係呀係縮細左,但竟然厚左,近 2 年啲片先啱啱就到佢個奇怪比例,用盡個 Mon 但啱啱見唔到個 M 額,佢依家加厚左,真係無言,我寧願你維持寬度,但變薄個體驗仲好(我明所有 App 要重新寫過,但依家都係要執位啦。。。出曬界咁,雖然唔係出好多,但都要改架。。。)
2:無 Touch ID
唔解釋啦,你明就一定明
3:鏡頭好突
我明白物理限制,但明唔代表佢唔係缺點,放係臺面今次真係怕會爆,唯有買個殼會托高部機少少避免撞爆,但部機係檯面就變左搖搖板,唉。
4:重 真係好重
佢係 6.1 吋屬於細機型號,但佢嘅重量係 iPhone 8 Plus 一樣重(正確黎講係差 1g,但你唔會分到 1 g ),更唔好講 iPhone 13 Pro Max,(我知一定有人講 8 Plus 得 5.5 吋炸喎,係呀 iPhone 12 6.1 吋重 162g,13 Pro 重佢 25% 完)
5:遠攝鏡其實退步左
係,佢 Zoom 遠左,但光圈細左好多,f2.8 你唔開夜景模式,基本上暗少少就會自動換廣角黎影,搞到數碼變焦,質素下降,Apple 可以比用戶自己揀嗎,我地有時寧願張相暗啲,多啲雜訊,都唔要數碼變焦呀,唔洗你咁好心幫我地決定。
評價:
係有好多缺點,不過整體使用上,比起 iPhone 11 Pro 升級 iPhone 12 Pro,今次 12 Pro 升 13 Pro 個驚喜同體驗反而更大,利申我每代都會玩曬咁多部機(因為行業需要),13 Pro 建議鍾意影相,追求對焦快,穩定嘅 Android 用戶,或者用緊 iPhone 11 系列或之前嘅人購買,當然 12 Pro 嘅用戶唔介意外觀無變嘅都值得升級,(因為 12 Pro 太廢)。