[十二少]

每年都有強姦案發生，最終亦有一些被告獲判無罪。案中的女事主，都必須向這些禽獸道歉，甚至自願跟對方上多次床，作為「補償」。

這個結論，是基於香港特別行政區行政長官梁振英的思維邏輯而得出的，因為佢話，廉署唔告張震遠和林奮強，最先提出投訴的人，應該道歉嘛。

照佢意思，警察老廉一年拉咁多人，不少都告唔入，咁一哥係咪要逐個道歉？袁國強係咪要叩頭認錯？梁振英你的意思係咪叫全港市民做埋神探伽利略，唔查到水落石出證據確鑿，都唔好走去警署廉記舉報？若果係咁，仲請咁多警察做乜？定係你想話俾老廉聽，所有你馬房的愛將，都有刑事豁免權，唔駛旨意郁到佢地一條毛？



一個老師工餘時講粗口，竟要勞動教育局局長寫報告？你痴咗邊條線？每天香港爆粗者，恆河沙數，倘若出口成文者乃律師醫生會計師工程師，係咪又要逐個 政策局寫報告？某個國家的國民在市中心高呼WTF，總統認為有礙市容，下令教育部長馬上寫個報告交俾佢？這不是國際笑話，是甚麼？



你個梁振英，奢想挽救自己已無得救的民望，不惜煽風點火，撕裂社會，把一些早已慢慢淡化的事件重起火頭，製造敵我矛盾，你這些蛋散，還有資格面目做 一市之首？仲話自己成日「微服出巡」，嘿，你真的把自己當成皇帝，平時著住黃袍返工的麼！再看看場外那些惡霸（嗱，我無講個「黑」字呀，陣間又收律師信， 我會好驚驚架），如假包換就是文革年代的文攻（場內）與武鬥（場外）。練乙錚當天收到律師信，如今看來，練兄是道出了事實，某些人才會這樣發爛渣！

我一直熱愛這個出生和成長的地方，為何可以俾你呢班人，搞到污煙瘴氣，猶如化糞池般令人噁心？



現在，我真的不想梁振英馬上下台了，希望你繼續留下去，因為你加埋整個班子，才有足夠力量，讓更多香港人齊心插爆你地！佔領中環，我一直心大心細，但慢慢已覺得，越來越清晰。有些事情，我唔係真係好想做，而係根本無得揀，唔做唔得！

香港人懷念董建華與曾蔭權，其實是一件悲哀的事，但至少我們感到，董曾二人雖不才，做人起碼還有良知，還有底線。梁振英？你作為「人」的底線都沒有 了，除了人渣，還有其他匹配的形容詞嗎？如今只能把林慧思當天在旺角行人專用區的那一句，轉贈予你：WHAT THE _ _ _ _!!!

[十二少]