Fever小編手記 - 白泥D泥好危險?

我哋呢D攝影人，最鍾意去埋D又山旮旯又刁鑽既地方影相，少人去先別嘛！不過呢類未開發或者荒廢地方，有時都會隱藏住古靈精怪既陷阱。放心，小編唔係講鬼故，不過呢件真人真事真係值得大家留意。 

位於流浮山既下白泥，對於攝影人嚟講就唔駛多介紹，由幾十年前上一代到而家都係熱門既日落攝影景點。顧名思義，白泥大部份地方都係一片泥灘。平時大家都會去泥土比較實既地方影相，但都有D想搵下新構圖既師兄，會行遠少少睇吓有無景。 

但係白泥有D地方既地質真係好奇怪，呢一步係實既泥地，行多一步就會突然變左好軟既泥沼。小編每次去白泥影相，幾乎都會見到師兄中招，但多數都只係成隻波鞋變成朱古力咁樣，都唔算好大鑊。 

不過有個老友就同我講左一次佢既遇險經歷，佢試過成半個身跌咗入泥沼動彈不得，電話、背囊同腳架又放埋左一邊，叫救命都無人聽到。睇住個太陽就黎落山，日落天黑埋就真係GG喇。好在臨尾被人發現，但都要報警call消防救佢出嚟。 

小編聽完果陣都覺得半信半疑，唔知佢係咪吹大咗，但有次我要幫手搞會員攝影活動，都特別提醒參加者要小心泥沼。影到5點幾果陣，點知真係發現有位唔係參加我哋活動既師兄跌左入泥沼，得返半個身突出黎，兩隻手舉住部相機搵人救命！我哋幾個人搵到條樹枝，伸過去比果位師兄捉住，夾手夾腳終於拉返佢出嚟。見到佢下半身又污糟又臭，真係覺得佢好慘呀！ 

小編呼籲大家，影相還影相，最緊要安全至上呀！ 

---- 

如果大家想提供有趣既攝影相關故事分享比大家，歡迎 inbox 比小編，或者 email 去 info@dcfever.com，多謝收看!