圖片︰Martin Lam
相信大家都知道著名攝影師葉青霖喺2010年正式出家，法號釋常霖。不過佢仍然積極透過攝影推廣佛法及進行個人修行，所以小編耐唔耐都會同常霖法師見到面傾下計。最近小編帶咗幾個同事同常霖法師做個訪問，講返起幾年前一單笑料，真係經典過佢出家前創辦既「現代經典」，唔share唔得。
話說幾年前小編約咗常霖法師喺灣仔一間café傾嘢，小編準時去到café就見到佢已經坐咗喺度，但係佢對面就有個年約50歲既女士同佢傾緊計。小編下意識諗到，可能法師之前另外約左朋友喺呢度傾嘢，而家仲未傾完，所以小編就客氣咁叫佢地慢慢傾啦，我喺隔離等吓都得。
小編叫咗杯咖啡一邊飲一邊等，不過無耐就發現，常霖法師同佢朋友既交談狀態有啲古怪。嗰位女士有少少肉緊咁捉住法師隻手，個人稍為傾前，不停極細聲同佢講唔知乜嘢。而法師就合埋對眼，有少少縐眉頭，好似有啲辛苦，但又無講啲乜。
過咗十幾分鐘之後，嗰位女士終於都講夠走人，常霖法師就如釋重負咁既樣。
小編︰法師，嗰個你朋友呀？
法師︰唔係呀，我唔識佢架！
小編：吓？咁你又同佢講咁耐？
法師︰我早到坐咗喺度無耐，佢就走過嚟點我相喇。
小編︰你係公眾人物，認得你唔出奇呀，但係有乜咁好傾呀？
法師︰佢坐低咗之後，就話自己係教徒，即場同我傳教喇！
小編︰吓？咁都得？
小編要重申一點，一樣米養百樣人，任何一個多人信既宗教，自然都會有啲較為奇特既信眾，千祈唔好標籤任何一個宗教。況且嗰位女士亦唔係神職人員，佢只係自稱教徒，但無人知佢其實係咪真教徒定係有其他問題。呢個奇遇就當係趣聞一則，唔會有任可結論，一笑置之啦！
----
如果大家想提供有趣既攝影相關故事分享比大家，歡迎 inbox 比小編，或者 email 去 info@dcfever.com，多謝收看!
