作為攝影發燒友,身邊既朋友好自然會問你攝影技術、器材選購之類既問題。有啲朋友知道你有一堆相機、鏡頭閒置唔常用,仲可能會問你借嚟影吓相,遇到呢個情況大家會點處理呢?
借定唔借,考慮既嘢都好多,例如個朋友有幾熟?佢識唔識用?佢份人小唔小心?借既器材有幾貴?借黎影啲乜?要借幾耐?真係total loss佢賠唔賠得起?
小編有個老友,早排就借左支24-70mm f/2.8比朋友試玩。還返支鏡果陣,朋友就話支鏡比佢跌咗落地,不過支鏡就無跌壞,鏡身都無跌花,只係塊UV filter碎咗,filter框彎咗除唔到出嚟。支鏡無壞無花,又無理由叫佢朋友買過支新既。但老友算係鍚機之人,知道支鏡跌過落地,心裡面又覺得赤赤痛。
小編就安慰老友幾句,呢次咪當賣個人情囉,交朋友就唔好太過計較喇,唔通借嘢要比按金你咩。樣樣嘢都計住計住,搵到錢都唔開心啦,不如plan吓去邊度影相好過啦。佢朋友主動買返塊B+W UV filter再送多塊CPL比佢當賠罪,一年之後,老友支鏡仲無事無幹影得好地地,都算係happy ending啦!