[playmate]

《青姐手記－胡孟青》杜拜世界－金融界的計時炸彈
http://www.etnet.com.hk/www/tc/news/commentary_agneswu_detail.php?newsid=ETN19113071

　　《青姐手記》金融界突然出現「恐怖襲擊」，星期四（２６日）其實一大清早，睇財經新聞都知道杜拜世界財困，要延遲還債，當時個市風平浪靜，短炒王仍在輕風作浪。點知下午番來，彷彿係歐洲佬瞓醒，即時「狂派再現」，到上周五（２７日）直頭係不問價沽貨，令港股成為全球跌幅最大市場，破紀錄１４０隻牛仔陪葬。

　　　　　　　　　　　　　　　＊雷曼在前，驚弓之鳥＊

　　呢單中東「恐怖襲擊」背後充滿疑點，先係無端端喺四日伊斯蘭假期前靜雞雞發出有關訊息，並重申有需要咁做，但就無進一步解釋。但由於假期關係，市場搵唔到任何有關方面回應，喺今時今日資訊咁發達嘅財經世界，簡單的一宗債務重組便被無限放大，製造出以倍數計的市場恐慌。
　　就好似囝囝臻臻的本能反應，撞過一次玻璃，下次見到玻璃門，都會份外小心。呢次杜拜主權基金出事，市場即時與雷曼倒閉相提並論。不過，今次同雷曼唔同，投資銀行係游走喺傳統銀行、金融市場同實體經濟之間的「花蝴蝶」，喺場內場外的交易都係千絲萬縷，先至搞到引發百年一遇嘅金融海嘯。不過，睇返杜拜世界主權基金，雖然有近６００億美元債務，但其實佢嘅資產有一千億美元，根本不存在資不抵債的問題，況且遲還唔等於唔還。

　　　　　　　　　　　　　　　＊保留子彈，低位買貨＊

　　點解搞到咁大件事，有兩大可能。一係杜拜油長同阿布扎比口和心不和，大玩中東版「宮心計」。因為杜拜本身無油又無錢，債務已係一年國內生產總值，一直係靠阿聯酋有闊佬疊水嘅阿布扎比關照。阿布扎比擁有整個阿聯酋９０％石油儲備，而佢亦係杜拜世界最大嘅債權國。外界認為阿布扎比為求保住自己利益及阿聯酋聯盟關係，根本不得不救，情況就正如中國明知美國係黑洞都要向對方買國債的道理一樣。喺今年２月，阿布扎比已對杜拜進行了援助，買咗１００億美元的應急債券，最近國有嘅阿布扎比銀行本又再買了５０億美元杜拜主權債務。所以只要公開「賴皮」話無錢還，站在阿聯酋立場，一定有人打救。到時世襲嘅杜拜酋長穆罕默德．馬克圖姆，就可以繼續完成好大喜功的「日不落王國」建設大業。
　　仲有一個可能係，財技高手的酋長先生可能一早喺市場沽空大量金融股，特登搞單嘢引起市場恐慌，從而獲利還債，否則點會喺四日回教假期前突然公布，要市場只能估估下，恐慌情緒自然引起人踩人沽售。不過，事件是有心又好，無心之失都好；另一方面想，對投資者反而是一件好事，除咗俾機會低位買貨，亦告訴大家要保留子彈，市場類似的恐怖襲擊將會始起彼落。
《獨立股評人　胡孟青》

[kingkonghk]

你9係肥花炸旦啦

[oly750]

胡孟青姐姐講野都信, 睇怕你都好難贏錢