[hlcmarco]

上個星期,仔仔通知我,話佢喺星期一端午節當日會出戰西貢區龍舟比賽.
叫我請定星期一假去幫佢影相,重可以開車送佢去西貢參賽.
點不知佢計錯數,我係返通宵班嘅,佢在星期一早上七時要集合,八時就要參加初賽,十時就要參加覆賽.
我應該係請星期日假,而唔係請星期一假.

冇計諗,假都請定左,冇得臨時取消.
唯有仔仔自行前往西貢,我七時喺青衣下班,一收工就立即開車趕返屋企,
拎住仔仔幫我執拾好的攝材,就第一時間趕去西貢跟佢會合.

天公都算做美,嗰日天氣都唔算係太熱,對比返早一日星期天的高溫,紫外線強度指數竟高達10,
達到最高級別,真係人都曬得濃,果真不可同日而語.

我約莫喺八時三十分到達比賽場地,哈~,竟然畀我搵到個非常好的頭位拍攝喎,真好彩.
早少少嚟或者遲少少嚟都埋唔到呢個好位,真係冥冥之中有定數.

同仔仔通過電話,佢話初賽已完,佢稍事休息,在十時就要參加覆賽.
佢問左我位置,轉過頭來佢已行到我身邊.
佢好開心咁話我點解咁遲嚟,都可以搵到呢個咁好的頭位.
我話我都唔知,總知我見有好位,就立即二話不說埋位擺陣啦.

佢幫我攞埋個工作證,佢問我是否想入去工作人員的拍攝專用區影相.
我話唔使了,我搵到呢個好位,我都好滿意,唔使用工作證了.

仔仔原來已幫我準備好的攝材如下,我真係睇都冇睇過,我信晒仔仔的決定.
7D配上Canon EF 100-400mm f/4.5-5.6L IS USM,
D3s配Nikon AF-S DX NIKKOR 55-300mm f/4.5-5.6G ED VR
加多支Nikon AF-S DX NIKKOR 10-24mm f/3.5-4.5G ED.
還有兩塊CPL,氣泵和鏡頭筆,DD PRO低通濾鏡吸塵機,鏡頭紙,
單腳一支,長袖風衣,有面罩的漁夫帽,太陽眼鏡,太陽油,蘆薈補濕啫喱,飲用水一樽.
仔仔果然夠細心,裝備一應俱全,完全令我可以無後顧之憂.
我係一個攝影獨行俠,獨斷獨行,自由自在,無拘無束地享受幫仔仔拍攝的樂趣.
7D配大白,相對焦距有成640MM,尚算夠影.用埋支單腳,就更加輕鬆自在.
好彩仔仔唔係幫我準備三腳架,人太多了,好難開到三腳架的.

十時三十分,仔仔比賽完畢,我亦算影完,執拾裝備離場,但仔仔要開會,我就返屋企整理相片,然後備份至相片伺服器內.
發覺支大白果然靠得住,但係支Nikon AF-S DX NIKKOR 55-300mm f/4.5-5.6G ED VR都算係幾弱下.
唉!一分錢一分貨,重想點吖,支大白HK$12,700,支NIKKOR 55-300mm f/4.5-5.6G ED VR只係HK$2,850
價值相差接近一萬元,佢有返咁上下表現,都算可以叫做交到差.

下午一時左右,仔仔返到屋企,在相片伺服器下載相片嚟睇.
NIKKOR 55-300mm f/4.5-5.6G ED VR弱就真係弱左少少,算數啦,仔仔都收貨.
支大白啲表現,仔仔好滿意,我亦可以功成身退,立即沖涼上床休息.

端午節,都叫做影下龍舟相,應下節,一為神功,二為弟子;一次過可以滿足到兩個願望,都算有賺囉.

[look_yau]

good stuff!

[cyrusdc]

多謝分享

[kin7944]

真係"嗨皮"~

[richardlee326]

thanks for sharing! :-D

[phywmche]

堅呀CHING!返完通宵仲可以影相!
呢D就係真正攝影樂趣!

[Roylaukh]

享受攝影樂趣......enjoy.

[wolfwolf3D]

D3s 插支DX鏡搞乜!? 一個人一對手一隻眼帶咁多仲要焦距重覆, 真係要好享受攝影樂趣先頂得順

[hlcmarco]

look_yau、cyrusdc、kin7944、richardlee326、Roylaukh各位師兄:
咁悶的貼亦可以睇完,謹此致謝!

phywmche師兄:
上個月之前,我返完通宵班,重要趕住返早班添呀.
只不過去完西藏之後,有少少反思,唔想咁辛苦,所以至暫停咗份早班.
所以我通完頂,幫仔仔影相,對我來說,都唔係一件太辛苦的事.
我係好享受拍攝的過程.

wolfwolf3D師兄:
剛剛雙修不久,鏡頭群不足,唯有將就一下,希望不要見笑.
我帶支大白去,我有兩部C記FF機都唔帶去,反而帶部7D去,就係利用它的1.6X,
有利遠攝,相對焦距有成160-640MM,算叫做勉強夠用.

N記亦然,FX鏡我只得支24-70 f/2.8,唔夠遠攝,所以唯有拎支DX鏡去,又係利用它的1.5X,
況且支55-300剛買不久,只係拎過去西藏,我想試清楚一點吧.
雖然你覺得係焦距重覆,但係唔同機種喎,我想做個對比.
雖然用支EF大白L去同支DX 55-300去比,確實係有欠公平,
我都想睇下佢哋究竟係差幾遠,結果我一睇相,真係立竿見影,高低立見,
差左幾班,咁我起碼都叫做心中有數吖.
經一事,自會長一智;我一有旅行或外影,我都會儘量安排到每支鏡頭,
每部相機都有機會出下街,否則好易發霉.

我用C記中階機7D去配支L鏡,再用N記旗艦機D3s去配支普通鏡,
引証咗鏡頭是成像的命脈,雖然7D都未用盡支大白的成像圈,
而D3s已用盡左支普通鏡,亦不能扭轉乾坤,輸足成條街.

師兄,一個人係有一對手,兩隻眼的.
你尚未計個心喎,有人可以一心二用的.
在相差無幾的重覆焦距內,尋找出兩者的最大分別及差異,
實在是有所得著的.
我確實好享受攝影過程中的樂趣.

唔似得有啲人可以有錢買機買鏡,但只係長放防潮箱內,
佢啲機,佢啲鏡重覺得冤枉啦.

[wolfwolf3D]

只係天氣咁熱想象到帶咁多去試, 真係好有興趣先得

試還試, 影珍貴時刻來做試影實驗?

[hlcmarco]

wolfwolf3D師兄:
今回已算係極為輕可了,上次去四川海螺溝,高山冰川極地,我亦帶左五機七鏡啦.
不要用自己的尺度去量人,各有各的能耐.

仔仔就係怕有鑊氣,所以佢要我雙機同行,有部7D配支大白L加單腳,已立於不敗之地啦,
起碼都夠交功課返公司.
支普通鏡配N記FX機,今回真係當實驗性質咋.

$2,850元的普通鏡,都可以叫做物有所值,唔通要佢可以有支大白L咁嘅表現咩?
粗粗地用住先,啲錢要慢慢儲返嚟,不能過急,慢慢逐支試清楚,循序漸進,欲速則不達的.

[look_yau]

呢到好多 Ching 都會話唔需要帶噤多機同鏡。如果你問我，我會話其實一機一鏡都足夠。

不過人地鍾意點就點啦。佢又唔係問大家意見，同埋我相信佢唔會聽你講 XDD

[nwt15]

不過人地鍾意點就點啦。佢又唔係問大家意見，同埋我相信佢唔會聽你講 XDD x2

可能係習慣同喜好, 就好似有人鍾意用天涯鏡, 有人鍾意換鏡咁啩...

[wolfwolf3D]

不過人地鍾意點就點啦。佢又唔係問大家意見，同埋我相信佢唔會聽你講 XDD x 3

[Roylaukh]

我個人認同各有各喜愛,不論3機4-8鏡又好 .
只要自己影得開心就OK....