[csmarco]

2009年3月2日星期一的晚上,是第二十九屆全港學生公開攝影比賽作品展覽暨頒獎典禮.
我兒早前收到香港浸會大學攝影學會主席來函,告訴得到獎項.
來函希望邀請小兒出席作品展覽暨頒獎典禮.
由於仔仔須要在課餘的時候,到一間公司兼職以賺取薪資,繳付學費及自己日常使用之需要.
而公司有名文規定,要求員工不能無故請假,否則一概當自動離職論.
由於仔仔早前兩天,學校搞左個廣東英德攝影團,他為了參加旅行而請過事假.
若再請事假,肯定今晚有餸加.....豉椒炒魷!
此份職位對我仔仔這位清貧學生來說,是異常珍惜,
他實在不想在這個經濟環境如此惡劣下,失去這份貴寶的兼職.
所以他要求我帶同佢的書面授權書,委任我帶同大會寄給他的邀請函和他在香港基督教服務處,
觀塘職業訓練中心的學生證出席,替仔仔領取他想要的獎項及限量紀念影集.

我都係剛剛收工回家,鬼死咁攰,見仔仔叫到,做爸爸的,又怎可以婉拒.
仔仔幫我執左啲攝影器材,叫我幫佢影多點相片回來,等佢可以收工回味一下頒獎典禮的情況.
拎住個相機袋,我睇都冇睇仔仔幫我執左啲乜,就趕緊開車送仔仔返公司開工,
落低佢跟住就開車到尖沙嘴文化中心展覽廰出席典禮.

到場交左封授權書會工作人員,並領取左獎項和本限量紀念影集.
跟住我就坐低,睇睇有乜相機可用.
原來仔仔幫我執左一部5D,一支17-40 F4L一支24-105 F4L和一支580EXII.
我先拎支17-40去影左好多會場的環境,之後就一直用24-105影足頒獎全程,
都係唔好將啲鏡換來換去,以免愈忙愈見鬼,到時跌咁支落地下就真係欲哭無淚.
支580EXII配上充滿電的sanyo eneloop 2000mAh充電池四枚,
支閃燈用M MODE全出都可以總數影到180張有多,但充電池有電由自可,
一冇電就立即回電慢到驚,勉強執多幾張散席相,重自動關埋燈添.
唉!家有電池匣,點解仔仔唔幫我放埋入袋呀?
仔仔回家後,給我訓示一番,我話佢乜唔記得上次影婚宴敬酒中過招,重要我歷史重演!
他經我訓示後,話知道下次有宴會,必定會記得帶埋個CP-E4去.
講返頒獎禮,光線不足故不在話下,啲人個個背著射燈,唔開閃燈用點測光就必爆無疑.
見到有個學生,一個人拎左好多個大獎細獎,獎杯獎座放到通地都係,
我立即用鏡頭影下佢豐厚的收穫,我垂下鏡頭,對著獎品,然後將閃燈轉向後,與獎品成相反角度才拍攝.
因為距離近,燈頭如果向著反光度咁高的獎杯和水晶獎座,閃燈自動CUT燈都會CUT唔切,
我又唔想轉較低輸出,唯有拗轉向天光做反射,結果曝光正常.
臨走前重有迷你自助餐食,我嗰日只係食左個早餐,晏晝都冇食,幾大都食到飽一飽.
最好可以飽到明早唔使食早餐,咁又可以慳返多點錢買攝影器材給仔仔.
唉!買機背後,確實隱藏無限辛酸.
其實我唔係咁想講太多大會的情況,因為我本人覺得有點兒做馬成份.
主辦機構是浸會大學,三個特別大獎竟由浸會大學二人包辦.
而彩色組的銀獎,優異獎和黑白組的金獎,優異獎共四個獎項亦是由剛取得三個特別大獎的二人橫掃.
即係浸會大學的兩個學生,二人共取走七個大獎項,其餘18個獎項,就由10間學校的18個學生均分,每人得一獎.
我仔仔所讀的學校,都拎返五個獎杯仔,好過冇,當係豬肉獎都唔錯.

兩位浸會大學學生,拎左獎杯獎座七個事少,只不過係兩個孭袋裝唔哂;但係佢地又拎左七份禮物事大,
冇一部大的手推車都推唔走,手拉車???NOWAY!!!!

自己人評返自己人,唔睇僧面都睇佛面,打狗都要睇主人啦!
佢地知道大會的評審美學準則,只要肯溝通溝通,
成籮禮物定當手到拿來,使乜畀面其他學校呀?直頭當佢地死都得.

事後,仔仔睇完相都覺得有少少.......只不過佢唔敢同老師講.
會場散席的同時,我看到有部份得獎學生沒有領取限量紀念影集.
我問過大會工作人員,可否拎多一本給我仔仔的老師,他們都欣然答允.

翌日,仔仔帶同我影的全部相片和我多拎的一本限量紀念影集給老師.
我仔仔的其他得獎同班同學,個個都冇拎過一張相片給老師睇,
更不用談論會拎本限量紀念影集給老師啦.
我跟仔仔說,年輕人,就是較易忘郤栽培他們成材的人,學期一完,又有幾多個還會將老師放在心上.
雖然仔仔的老師我從未見過,但我絕對知道,為人師表者,總想看一看門生的成績.所以我會拎一本給他的老師.
我點解會知道???因為,昔日.......ME TOO.

[hizaku]

Thanks your sharing.

Not your 蝦轆 but your heart to your child.

<<...咁又可以慳返多點錢買攝影器材給仔仔. 唉! 買機背後,確實隱藏無限辛酸.>><<一部5D,一支17-40 F4L一支24-105 F4L和一支580EXII>>

I really respect you!!

[csmarco]

就係因為啲錢係我節衣縮食省回來,
所以我至會想過度過計過才買每部相機和每支鏡頭.
如果係富貴財主,話買就買,使乜左格右格,左度右度.
因為買錯左任何一件器材,一買一賣都會唔見錢.
錢,從來都是得來不易的.要咁蝕,好似唔係咁值得.
上次仔仔同女朋友外影時被人偷了部G9,我都要佢全數賠返俾我.
等佢知道我係有幾肉痛的.

[何足道]

我正想買支17-40喎,試過朋友兩支17-40 & 24-70,我都想買24-70........價啱我所以17-40先啦

[csmarco]

何足道君:
EF 24-70MM F/2.8L USM呢支大光圈變焦L鏡頭雖好,但實在太貴,又冇USM,我沒法負擔得起.
反而EF 17-40MM F/4L USM和EF 24-105 F/4 IS USM呢兩支較細一級光圈變焦L鏡經濟又實惠.
EF 17-40MM F/4L USM上年6月4日用現金價買,$5,200元.
EF 24-105 F/4 IS USM就KIT裝連5D一齊買,現金價$21,500元.
我買機鏡都喜歡用現金買,可以平多一點.
17-40用在APS-C機上,感覺好似變左27-64.
焦段幾實用,光圈係細左少少,但L鏡始終比較高質,對焦又快又靜.
預算唔多的,用騰龍支A16都唔錯,焦段是17-50,同17-40L差不多對焦係慢少少,嘈亦嘈左少少,
但係付出郤相對平左好多,A16只係$2,750元,而家CANON鏡頭加左價,所以比17-40接近平左一半.
如果係FF機,17-40L本人就覺得除左要影比較WIDE的風景相或者場景相會好,
普通日常用就覺得唔夠TELE,下下要行到好埋,較為不便,影人好驚被人打.
所以我一出機就配埋支24-105L,日常用好正,WIDE和TELE都取得一個合理的平衡點.夠TELE,影人被人打都夠距離時間走得切.
但若用在APS-C機上,又覺得唔夠WIDE!
CANON的設計總是令人頭痛,令人買完一支又一支,好似前世欠左佢咁,真係慘!

[luckystrike536]

EF 24-70MM F/2.8L USM呢支大光圈變焦L鏡頭雖好,但實在太貴,又冇USM <--- USM 鏡頭冇 USM? :D

[hongdonald]

清貧學生?唔見得吧,如文中所講,你仔仔應該同小弟差唔多年紀,around 20歲到,相機呢家野要自己搵$買先有意思.小弟既器材冇問過屋企人問拎一分錢來買,一句講哂,既然你話你仔仔係清貧學生,相機呢d唔係生活既必需品,就冇必要同佢出埋錢買比佢,感覺你太寵佢

[Obi-Wan]

hongdonald "清貧學生?唔見得吧" <==== totally agree, may be just a showing off
"相機呢d唔係生活既必需品" <==== totally agree

hongdonald, u add oil to study, u will get into university, to gain whatever u like by yourself after graduation & get $

ADD OIL!

PS, I have many photo gear, I earned them all in the last 30 years. I enjoy collecting them.

[webhappyman]

Thank you Sharing.
給兒子的老師送上影集，是教子有方的好做法。
這可能是現今父母所缺乏的家教之道，
你看，天水圍天耀邨case，父親縱容兒子玩火藥，不是氣死人嗎？
你教孩子學會父子相處之道，尊師和珍惜金錢，
金融海嘯下，求生之道也。　
恭喜!

[csmarco]

我仔仔只不過是18歲半,年紀尚輕.

相機呢樣野你話要自己搵錢買,你的器材冇問過你屋企人拎一分錢來買,你覺得先有意思.
我又想問一問你,如果仔仔學攝影,能夠得到做父親的全力支持,和得到父親的肯定和認同,咁又有冇意思先?
咁你又有冇試過問你屋企人拎錢買攝影器材呀?你估又問唔問到呢?
我仔仔有次睇完一本第101期數碼双周,翌日拎住本双周向我提及昨晚發夢,
竟然夢到我買左一支EF 100-400MM F/4.5-5.6L IS USM給他.
我笑笑口咁叫佢拎本双周比我睇,之後佢就返左學.
到左中午,我就開車到旺角,立即提款買左支大白給他,現金價是$11,300元.
我將支大白放在仔仔的書桌上就返左工.
仔仔在兼職收工後,見到桌上竟然真係有支大白喺度,佢開心到立即打電話同我講,
話佢好開心,竟然真係可以夢想成真.
我重同佢講,過多兩天就係星期六,佢唔使返學,又唔使返工,我開車車佢由將軍澳去天水圍濕地公園打雀,
影完再車佢去白泥影日落,佢聽到之後不知幾開心.
我重買左一年的全年合家門票給他,方便他可以隨時和我去濕地公園影相.
最後我同佢講:"仔仔,只要有夢想,凡事可成真嘛;有乜野都可以同爸爸講,兩仔爺,有乜所謂吖."

你話我仔仔係清貧學生,相機呢啲唔係生活必需品,就冇必要同他出埋錢買比佢,感覺我太縱佢.
清貧學生唔可以學攝影嗎?攝影只係你地啲富貴子弟的高尚玩意嗎?
興趣係生活的必須品,我有必要買攝影器材,同仔仔一同享受攝影的樂趣.
你有錢可以玩F/2.8L恆定大光圈,我冇錢就玩F/4L恆定細光圈.各自各精彩啦.
我從來都冇縱容個我仔仔,有次我仔仔同女朋友外影時,被人從背囊偷走左部G9,
我要佢全數賠返俾我,總數係$3,730元,我要佢知道,做人必須要好好珍惜手中物,好好愛惜眼前人.

講個真人真事給你聽,
兩個學生放假出街去影相,影到晚上十一時返家,但遭遇就迥然不同.
A學生一入門口,就聽到父親說:"死仔,玩夠捨得返屋企呀?而家幾點呀?影相有飯食呀?你影飽啦!日影夜影,屋企野又唔見你做,
一話你就只係識得匿返入房,完全當我透明,你咪旨意想有飯食,睇你幾時激得我嬲嬲地,就掟爛哂你啲相機,
睇你重可以影乜!"

B學生亦一入門口,就聽到父親說:"仔仔,好唔好玩呀?快啲沖個涼先,爸爸幫你備份左啲相片,跟住開枱攞飯餸你食,
再同你一齊睇相,睇下你今回又影成點,睇下有冇進步先.斟兩杯啤酒一齊飲啦,兩仔爺摸住酒杯底睇相,重過癮添!"

A學生與B學生,你估下佢地啲心智成長有冇分別呢?能否得到家人的肯定和認同,對學生是好抑或是壞呢?

[hongdonald]

To Obi-Wan
小弟已經讀緊u.
csmarco:
我唔想浪費時間同你嘈,香港係一個好現實既社會,你個套理論太理想,我老豆就係你講個句a學生既老豆,一開始我會好憎我老豆,不過日諗番,係現實世界生存,有幾多個名攝影師?清貧學生絕對可以玩影相,如果所講,"清貧學生"絕對可以玩影相,但係點解要係恆定光圈鏡,點解唔可以用dc仔影相.點解要老豆買d唔付合年紀同身份既高級L鏡?你個仔先18歲.到第日有d重大決定,如買樓/買車/買股票,又問老豆借?我唔係d咩學者高人,只係細個屋企唔算太富有,知道要點用錢,既然你仔仔有能力去工作搵錢,就比佢試試吧,

[Xplore]

呢個 topic , 包括之前

由始至終只睇反應

因唔想浪費時間睇樓主偉論

[Thomas1]

冇咩問題呀.

有經濟能力,子女用好野,絕對ok.
我同你家境一般,有錢人要學普通人消費模式??????????
至於有錢仔以後會唔會運唔到錢!!!!!!!大把人叻仔,運得多.
唔一定二世ga (父母好似足球教練,教好佢low)

思想要多元.

我自己唔係富貴人家出身.相機自己工作後,再買.

[CONTAINER]

我覺得CSMARCO對兒子十分寵,但關係亦十分好.你亦是一個其實在經濟上十分不裕的打工仔.
本人亦是兩小孩之父,明白做父親總想比最好的自己的小朋友.
但從A, B 兩學生的事分析, 樓主你可以(當你諗過下)就買左支大白比個仔,
大白WO, 我想之前已經會有更多的器材. 這些器材,莫說買比個仔, 連買比自己都未必負擔得起.
B學生其實都18,9歲,睇落都應該係自己去儲錢買相機,總好過用D錢去晒卡拉OK度,應該都係乖仔,只因他的家庭就如一般香港家庭咁要為糊口而努力工作,關係才未至於去到你們咁好.
真慘,頭先打過一次, 唔知點解唔見左,宜家又再打過.

[hongdonald]

thomas1:
樓主講佢仔仔係清貧學生,假如你認為樓主係有錢爸爸清貧仔仔,我冇野好講

可能我既思維模式唔同,細個受太多田鴨教育,想自立好耐,無諗過第日靠老豆
不過呢個case,我睇洛就係開壞個頭