[csmarco]

今日專程休息陪仔仔去2009香港花展影相.
錢,邊度會搵得哂;兩仔仔一齊去影相,我覺得比錢更重要.

今日同仔仔帶左四部相機,五支鏡頭和兩支閃燈去.
由早上十時開始影,影到下午一時就過左中央圖書館的展覽廳睇黃貴權和周潤發的攝影展.
睇完影展一齊去食飯,食完飯再到花展繼續影相,一直影到下午四時三十分,
見到天氣有變,烏雲密佈,立即離場,免招損失.

仔仔全日都係用5D,上午用佢用24-105和支百微,下午就全用百微.
佢帶埋腳架、電子快門繩和四頻引閃器去玩飛燈.仔仔全日影了419幅相.

我就比較麻煩,上午用400D配支A16,加埋SX1,再加埋EOS 5QD菲林機配支28MM拍攝黑白菲林.
下午400D轉配24-105,加埋SX1,再加埋EOS 5QD菲林機配支35MM.
我全日用400D影了315幅相,SX1就影左289幅相,EOS 5就影左25幅黑白相.

上午就真係好多學生和小朋友在花展做掃描繪畫比賽,令到場面非常熱鬧.
下午就少左好多學生和小朋友,但係就多左好多人入場,總括來說,全日都算好多人.

重型攝影架生就層出不窮,腳架多不勝數,中片幅機都大把,有個師兄又背囊,又手拉車,我睇到都好驚.
真係你有你影,我有我影,沒有見到有師兄會寸人啲相機唔靚喎.大師又會咁好彩,百年難得一遇都被你遇上.呵呵呵呵..........

上午啲花真係好靚,下午食完飯回來,竟然見到有部份鮮花開始凋謝,嘩!!!啲花點捱十日呀?

過多幾日,等太太休息,幾大都陪太太去影多次.
太太和仔仔都要好好愛錫,自己的時間只要好好分配,就可以魚與熊掌,兩者兼得.
現在忙於做數碼相片備份,下次影多12幅黑白菲林,就會拎去沖.
黑白菲林的感覺和灰通,是數碼相機絕對不能給汝的.

這個2009花展好正,個場很大,行到行到腳軟,今日天公造美,風和日麗,
雨都冇滴,又唔曬,中午只係有少少焗,下午就涼爽好多.
個人覺得,如果時間許可,這個花展絕對值得去.
成人14元,學生和小童7元,長者免費,重可以無限次入場,
只要離場時同工作人員講聲,佢地會在入場券蓋一個印,又或者在你掌背蓋一個印,
咁當你再次入場就不用再買門券了,這個安排好過工展會好多.

又要行,又要影,全程用了6個半小時,很累,回到家中太太已煮好飯給我倆父子食,
一個幸福的家庭,必定要好好維繫;人生就如白駒過隙,轉瞬即逝.
不好好享受天倫之樂,咁辛苦工作,還有何意義呢?

[Ison]

好好喎師兄幾時可以睇下你d大作.

[csmarco]

師弟的劣作,難登大雅之堂.
個人作品,全為太太和仔仔而影.別無其他.
我冇放相上網的習慣,咁耐都只係放過一相起,兩張止而已,還是有用途才會放.

幸好返家快,天氣明顯轉涼兼有雨,師兄們如果要去花展,記住要加衣為要,以免著涼.
天氣轉涼亦未嘗不是好事,起碼啲花都會耐放一點,否則,個花展要做十日,
如果日日都好似今日咁暖,啲秋英,康乃馨點擺到十日呀?

下次我再去,會帶支70-200和大白去,彌補今日未影過的焦段,
影相是一種免費的娛樂,買機買鏡當然係另作別話啦.
買左記得影多一點,咁至可以抵銷返相機的跌幅.起碼都會覺得係得物有所用吖.

[Ison]

真可惜師兄有這麼多神兵利器, 還說劣作, 太謙虛喇.

[csmarco]

師兄言重了.
小的有自知之明,自問天資遲鈍,拍攝只是九流技倆,獻醜倒不如藏拙啦.
神兵利器???唔好咁講啦.
我部部相機都OUTDATE,新機又冇錢買,起碼要到明年才儲夠錢買新機.
況且,我支支定焦都是平價貨,一支定焦L都貴過哂我全部定焦啦.
變焦全部都是細光圈L,大光圈L我都好想買,只不過是力有不逮.
大光圈變焦得一支平價版的A16,我睇見都自形慚愧,對比好多師兄們,我亦顯得相形見拙.

我都係陪太子讀書,我見仔仔咁鍾意攝影,我至陪佢癲.
工作已很繁重,收工都攰到想死,休息又唔見錢,只不過....,唉!!!投其所好,做父親亦在所不辭咁話啫.

今日影左成日,搭地鐵來回費用不多,入場費、午飯、飲品和生果,一共使左八十八元.
一百元都唔使,咁就可以兩父子玩左一日,除笨有精啦.
你估我唔識計數咩,咁低的消費,影足一日,計落好划算.
仔仔食完晚飯去左同女朋友拍拖,太太又返左工,我而家要將啲相做備份和抄落USB手指度,
等太太收工,和仔仔去完街街,一家人至可以坐埋一齊用PS3播返今日啲相嚟睇.
而家真係好攰呀,我要休息了,年紀大,機器壞,今日影相踎低起身見頭暈,睇怕我都係時日無多了.
過得一日得一日,唔係重可以點吖?唉!!!!!!!!!!!!!!!

[william_lau]

D花係會隔幾日換新的。

[csmarco]

william_lau
由於實在太多相要抄落USB手指度,我重要等多二十分鐘,所以就回覆埋你至去休息.
我明白你所講,亦見到有很多工作人員不停換花.
但係,實在真係有太多太多花啦,根本大會有時想換都換唔切.
有很多展品,好難換,根本可以叫做冇得換,你去過2009花展就會知道.

古語有云,人無千日好,花無百日紅.
太多人氣的地方,鮮花會更容易凋謝,有些缺德的市民重用手去摘,傷上加傷.
天氣凍少少反而好少少,如果日日都好似今日咁,一個星期過後,我都唔知會變成點!

雲泉仙館,我成日都有去影相,上個月佢都有個花展,一個星期後,我再去影,
嘩!!!簡直只可以用冇眼睇去形容,兩條用花砌成的龍鳳,只係得返個殼,睇見都心傷.

你有空就早點去,否則就會睇少好多靚花,去一日都好難影得哂.
況且我又冇那位師兄咁誇張,又背囊,又手拉車,重型傢生空群而出,我睇見都驚!
我都係分開幾次去,每次都帶不同焦段的鏡頭去,唔使咁辛苦.

哈,我明天去銅鑼灣開工,好近花展,開工帶埋相機閃燈去,收工就可以影夜晩花景,亦不失為一樂也.
我太太其實鍾意睇相多過去睇花展,只不過我想陪太太多點時間,至會話同佢一齊去花展啫.

[william_lau]

我上兩年都有去過，都唔係第一天去，的確好多殘花敗柳。 明天我都會去影下。

[PurinMuffin]

CHing, thanks for sharing, you are great!
懂得享受投入攝影, 亦珍惜天倫樂, 叻叻叻叻叻!

[csmarco]

昨日知道今天會去銅鑼灣開工,所以今早就執左一些攝材返工.
諗住下午六時一收工就可以到花展影返輯夜市花景.影返兩個半小時都好.
點不知真係人算就不如天算.......
今晚竟然要開夜,老細話我昨日休左息,畀個機會我追返昨日的工數,
唉!!!老細叫到,點敢推呀?而家搵食咁艱難,加班趕貨就真係少之又少.
做多兩小時就可以有半日人工,點計都係好划算,但係我放在車尾箱的攝材就.....
晚上八時收工,整埋小小手尾,拎得部車,開車到維園已經係晚上八時三十分.
當車駛經維園門外的時候,真係百般滋味在心頭,我都冇辦法說服自己,
用14元去影三十分鐘相,況且我已看到很多市民已經開始離場.
唯有黯然地車埋啲攝材返家.

返到屋企,仔仔又去左拍拖,冇計啦,仔大仔世界,又唔可以怪得佢,
有異性,冇人性,我自已都係咁;俗語都有話:細嚟老母親,大嚟老婆親,這亦是人常情.
工餘之後我亦好多功課要做,唔好理我點解咁大年紀都會有咁多功課要做,
總之各自各精彩就得啦.
做完功課都已經是晚上十一時,又攰又餓,太太由於今晚冇煮飯,
所以自己就是是但但咁煮左個公仔麵,開多罐罐頭便算,總之食飽就得啦.
一個人出街食,好唔舒服,好似一個孤獨老人咁,所以我寧願食公仔麵算數.

寫寫下,仔仔拍完拖返家,一入門口重問我食左飯未?又問我今晚有冇去維園影夜市花影,
仔仔都叫做好有我心囉,個心都覺得舒服返左啲.

明天休息,情況許可的話,都會再去花展影相,希望可以如願以償啦.

寫到這裡,太太又收工返家,不再多寫,陪下太太和仔仔,享受下天倫之樂好過囉.拜拜!

[jacmissu]

係咪向維園呀 ?

[csmarco]

2009年香港花卉展覽,展覽地點在香港銅鑼灣維多利亞公園舉行.
今屆花展的主題是「萬花喜迎東亞運」,主題花為「秋英」.

展覽日期及時間:
2009年3月13日至22日(共10天)
上午9時至晚上9時

花卉展覽入場費 :
成人 $14
小童、學生、六十歲或以上的長者及殘疾人士 $7

即日重可以無限次入場,只要離場時同工作人員講聲,
佢地會在入場券蓋一個印,又或者在你掌背蓋一個印,
咁當你再次入場就不用再買門券了,這個安排好過工展會好多.
方便各位師兄們中途去午膳,買水飲,逛街,睇戲,去洗手街.
更甚者,可以出去煲煙,因為全場都係禁煙區.
影影下又可以出去煲下煙,抖擻一下精神,煲完再影過.
如果唔係的話,點頂呀?唔通為左煲支煙要買多次門票咩?點講都講唔通啦!

星期一至五入場優惠:
1. 長者及殘疾人士免費參觀.
2. 三十人或以上團體參觀,成人半價優惠.

[老叟]

今年我可能會帶部dc仔去,實行反潮流!!

[csmarco]

花卉展覽除左百花齊放,重百鳥爭鳴添.
有人乜都唔帶,剩係用眼睇.(夠方便)
有人做素描,(鉛筆,木顏色筆,水彩,粉彩)
有人用手機拍照,
有人用DC機影相,
有人用單反拍攝,
有人用大底片機攝影,
有人拍錄像,
各自各精彩,必有一樣適合自己的選擇,總之不枉此行.
今日天氣都幾好,晚上七時我就會去維園影夜市花景,個人覺得,又有另一番感覺.