[hlcmarco]

25-03-11(五)
連續開左幾晚日夜更,有點累.
今日早更終於可以休返一日,所以在昨晚夜更收工,今早八時返家就瞓晏少少.
中午十二時起身,已叉足電,就要好好利用今日的休假.
立即開車到觀塘廣場油麻地旅遊報告參加27-03-11(日)的東平洲、吉澳一天遊.
只不過是$154元,就可以玩足一日,超抵.
報完一天遊,跟手就去埋現代中國旅行社報名參加24-04-11(日)至01-05-11(日)
的海螺溝四姑娘山八天直航團,呢個團就要$6,689元.
海螺溝發源於蜀山之王貢嗄山,而四姑娘山就係蜀山之后,我想去這兩處地方已很久.
今回一次過可以去齊蜀山之王和蜀山之后,當真不枉此行.
去旅行,就要預早安班,做規劃,邊有臨時臨急話有假期就可以起行.
報完兩個旅行團,趁有時間,開部車去新蒲崗換下偈油.
換偈油車檢查約需兩小時,新蒲崗近南蓮園池,有兩小時可以影過痛快,
所以我又帶左兩機三鏡一閃出發.
影到差不多,車行就叫我可以返去攞車,時間剛剛好.
飲埋下午茶,因為有特價,咁抵,唔食就笨,返到屋企已經係下午六時.
做多陣打字功課,就上床休息,又瞓多三小時,就要返通宵班.

26-03-11(六)
通宵班收工,原本就要立即返早班.
但由於今日要約大型廣場停電做掣櫃加裝九個CT電錶,所以轉為晚上十一時才上班.
所以收工返家就立即爭取時間休息,重要推埋通宵班工作,又賺少左幾舊.

27-03-11(日)
早上三時十五分,工程竣工,立即收工返家休息.
四時上床休息,小睡三小時,七時就起身載太太返工,然後就泊好部車.
上樓拎齊預先執拾好的攝材出發,搭乘港鐵到大學站集合出發去東平洲一天遊.
今回就拎左四機五鏡一閃出戰,為四月尾的蜀山八天遊做選機預習準備.
其中有項遠眺鬼爪岩,好彩帶左部7D配埋70-200,剛剛夠影到.
但係原相喺在岸邊影出嚟,而遠眺就係由海邊影入去,效果差好遠.
吉澳就普普通通啦,餐午飯都幾好,唔錯.
嗰日好凍,得番13度,吹埋海風,都咪話唔凍到抽肋.
好彩我幾時都有兩手準備,900EU SUPREME極級羽絨.
皮手套和漁夫帽,都係啱啱夠暖.
開船時用D90配18-105,D3s配24-70,影影下就收番埋部D90唔夠遠攝端,轉用7D配70-200影遠眺.
吉澳回程轉用7D配135L,影左一輪.
天公不做美,去到主角東平洲竟然落雨,好彩我素來處變不驚,全部都在我預算之內.
去到東平洲上岸時係13:30,領隊話15:00就上船離開,只得個半鐘可以盡情發揮.
D3s配24-70冇防塵防水滴設計,驚佢頂唔住,轉用S90配潛水殼,
7D和小小白IS係防塵防水滴設計,風雨中照影,果然靠得住.
好在陣雨落左十分鐘左右,一收雨,S90就退下火線,轉回D3s配24-70.
去到更樓石,個景好掂,雙機都唔夠用,出埋D90配10-24,三機混戰.
D90配10-24影超廣角,D3s配24-70影中距,7D配70-200影遠攝.
一次過滿足到三個願望,唔使頻頻換鏡,減少入塵機會.
我忙於一地三機拍攝,影影下有個長者走埋嚟,話佢部500D配17-55有問題,影唔到相.
我心諗:嘩!老友,我都好忙喎,你部相機有問題又關我事?
個心雖然咁諗,但個口點都要尊重下啲長者.
佢話部機影影下出左句英文,佢唔明點解.
佢拎嚟叫我睇下,到我睇的時候又唔見左句英文.
總之就按唔到快門,轉用手動對焦又用到喎,咁我就叫佢用住手動對焦影住先.
我重問佢,你識唔識用手動對焦呀,佢話識,咁我就打發左佢走.
過左十分鐘到,個長者又走嚟搵我.
我心諗:老友呀,我得番唔係咁多時間影,你搵第個幫你得唔得呀?
我口不對心咁好客氣問個長者,部機又有乜嘢問題呀?
佢今次拎埋嚟時,我就見到出左句ERR 99,咁就真係有問題喎.
我又唔係CANON CS,我點幫佢解決ERR 99呢個問題呢?
我唯有拎支135L換左佢支17-55影左一影,冇問題喎.
一插返支17-55,就連AF或MF都影唔到,咁我就叫佢拎去CANON維修部整整支鏡.
佢扮到好可憐咁同我講,搭左成兩個鐘頭咁耐船,重行到嚟呢度至話影唔到,好慘!
咁我問佢有冇兩手準備呀?有冇帶多一支後備鏡,佢話冇,咁我話我都冇計啦.
佢竟然大膽到提出,問我借鏡用!
我心諗:唔係呀,老友,我孭得咁辛苦,你竟然想問我借鏡,邊有人會借鏡畀三唔識七啲人用呀?
佢開口問我借支135L嚟用,我話呢支定焦,插喺你部鏡好難用喎,唔信你睇下,相對焦距有成200咁濟,點影風景相?
佢睇過都話好難用,跟住轉口問我借支10-24添.
嘩!你唔係咁癲呀,我支係N記喎,點插落C記用呀?
跟住我就好客氣咁同佢講:阿叔,冇計,真係幫你唔到,你唯有用眼睇過就算啦,我都好忙,我唔阻住你囉.
立即快步離開,有咁遠時就走咁遠.
成個行程除左被個阿叔煩左一陣,都算好順利.
成個旅程影左一千一百幅左右.
返到屋企,過落手指畀仔仔用佢部手提電腦自己睇.
佢好用心咁睇哂,跟住就同我講,都係支10-24有氣勢,佢買嗰支24-70效果非常滿意,70-200做大特寫唔錯.
我倆父子,有個習慣,每逢影完相,一定會交換睇,交換心得和意見.
跟住放上FaceBook,畀其他朋友睇.
至於討論區,只是保留吹吹水的限度就算了.
做好相片備份,立即上床瞓番三個鐘,因為要返通宵班.

28-03-11(一)
因為昨日孭住咁重攝材影左一日,跟手重要返通宵班,所以都幾吃力.
幸好今日日班唔使返工,瞓到下午二時十五分起身,立即開車接太太收工.
陪太太行左一陣街,飲埋下午茶回家再瞓過,瞓到晚上八時起身,
車左太太去荃灣食晚飯,重行多一陣街,跟手車埋佢去港鐵站,然後又開車入青衣趕住返通宵班.

29-03-11(二)
開通宵班的時候,趁有空就拎左部隨身機S90出嚟影下相,總數影左三十幾幅.
收工見個天色幾好,開車去影多三十幾幅至返屋企.
回家做埋啲打字功課,做埋相片備份,上網睇下討論區,心情幾靚,因為昨日瞓多左,
所以又打下字發個貼,跟手就上床瞓,今日日班返下午二時,會收晚上八點.
今晚應該重要返通宵班,都係唔打咁多字住,儘量爭取多點時間休息.

[亞典波羅]

marco 兄可以圖文並茂好D.

BTW, 你的打字量同文筆同隔離台的"梨"大叔有得揮!! 你同佢打肯定傾足十九幾日都唔完 XD

[pigpig2000]

啋。。。。。一早起身就見到個"梨"字。。。瞌多陣先。 ~_~"

[look_yau]

多謝分享

[howardshum]

Marco

訓咁小得唔得架...

[hlcmarco]

howardshum師兄:
多謝關心!
年紀愈大,體驗人生會愈深.
個人認為,人,在意識形態上,是分為意識和潛意識.
意識是天使,潛意識是魔鬼.
有信心未必會贏,冇信心就一定會輸;這是金科玉律.
乜嘢叫做刻苦耐勞?刻苦:很能吃苦;耐勞:禁得起,受得住;
工作勤奮,經得住繁重的勞累.
唔係個個人可以做到刻苦耐勞,因為好多人的潛意識有惰性,即係錫身.
稍為辛苦一點,就會找藉口逃避.
就以瞓覺為例,好多人的潛意識認為,瞓得少,個人會頂唔順,先入為主認為唔得.
由於佢的潛意識已先入為主認定,唔可以瞓得少,所以佢會令自己瞓多啲.

我的意識,很強;絕對可以凌駕於潛意識.
所以我可以刻苦耐勞.
況且,瞓覺,唔係一定要瞓得多.
就以我太太為例,佢跟我剛剛相反,有道是冬前臘鴨,一隻好就會搭一隻差.
佢夠日瞓夜瞓,瞓極都話唔夠,愈瞓就愈眼瞓.
其實瞓多瞓少,睡眠質素是很重要.
我睡眠質素至今亦其高,一上床,如果要瞓,我真係可以在少於一分鐘就可以呼呼入睡.
我的睡眠狀態,是沉睡,睡得很深,潛得很入.
所以,我可以小睡三小時,就可以應付一天繁重的工作.
查實,有好多好多人都係每日瞓得三至四小時咋,只不過你地冇留意到.
漫畫家馬榮成,歌影紅星劉德華,佢地未紅的時候,都係為左日後嘅成功,每日只瞓三小時.

苦,有邊個會鍾意.
但請記住,苦盡甘來;到出糧的時候,有幾和味,就要睇你付出了多少.
好多人做一份工,就出一份糧,要就住就住,重要睇餸食飯.
我可以做到三份工,出足三份糧,別人要就住使一份糧,我亦可以就住使一份糧,
但係其餘嗰兩份糧,就可以供我盡情揮霍.
我從未出過貼問師兄邊支鏡頭PQ值高,我只信一分錢就有一分貨.
我唔需要PQ值高的鏡頭,我只會諗住要買邊支鏡,就會諗住點樣搵錢找數.
部D3s,條數已找清,辛苦只不過是個零月,咁就有部好機伴我終身.
好多人成日話夢想機係N記的FX或C記的FF,其實,只要有夢想,而肯付諸實行,凡事定可成真.
D3s和1Ds,我一同擁有,無他的,因為我肯為佢地而付出.

昨日日頭收工,跟手又要返通宵班,現在我已收工返家,幾輕鬆,完全冇半點難度.
我做了通宵班已十三年了,好多通宵班的工友,在收工的時候,重慘過被人打左一身,
我就好似老虎仔咁,龍精虎猛.
今日收工,重開車去左影昂船洲大橋,影左一百五十幅相左右,
個天有少少雨粉落,我至執機走人返屋企.
如果唔係的話,我重會開車去荔枝角公園的嶺南之風,再幫仔仔試多次支24-70添喎.

虎父犬兒,我仔仔做一份機電工程署電機學徒,一個星期只需返五日工,
放工重去讀埋夜校兩組課程就嗌哂救命,
其實佢工作上只需讀一組課程,佢話辛苦啲讀多組課程,考試及格之後,可以慳返一年時間喎.
但佢起碼在星期六和星期日有兩日休息.
呢兩日佢就日瞓夜瞓,我老細有兼職搵佢幫手,佢都話頂唔順,唔肯去做.
我仔仔經常跟我講:爸爸,其實我真係有懷疑過你究竟係唔係人類嚟嘅,點解可以日做夜做而唔使點瞓.
你啲動力來自邊度呀?
我亦笑笑口答佢:心,天下無難事,只怕有心人,有心,凡事就可以迎刃而解.你唔好經常找藉口放縱自己先得呀!

[look_yau]

其實都最後都係睇 pirority。

- 你覺得瞓覺唔重要，用啲時間黎搵錢，其他人覺得瞓覺重要啲。
- 你覺得買相機鏡頭重要，可以駛多啲；其他人覺得啲錢可以駛落第二啲野都。之前都講過，我老闆話駛幾皮野落相機都好貴，不過轉頭佢就買左部新車 -_-!!

[seesee88]

訓覺對香港人來講一般四五小時都好夠啦, 但都要睇下邊段時間訓, 午夜十二點訓同零晨兩點後訓, 就真係爭好遠, 長時間兩點過後訓好容易有暗病, 家中有老有嫩, 都係定期檢查身體好D.............

[hon279973ww]

我自己都係做機械維修工程，好清楚一個人身體既承受程度，后生時搏到盡又要玩樂，精神同體力嚴重透支，四十出頭己經關節出現肩周炎同成曰傷風。可能自己既承受能力低啦，有個同行老前輩半開玩笑同我講，透支左你就預左有排還，分長黎玩啦。之後我學識左放慢，分配多的時間係家人朋友到，更加學識左珍惜眼前人。呢的純粹個人膚淺見解，不喜勿插

[howardshum]

marco

睇完之後的感覺, 你好勁...不過都係個句, 唔好扯得咁盡, 身體要緊, 錢可以搵, 生命只得一次...捱懷左就大鑊...

[mmclub]

Ching睇黎几大只下，一个拎甘多野，是咪要用果种拉杆箱

[hlcmarco]

mmclub師兄:
我是用大型背囊孭在背脊上,我從不用拉桿式背囊,我怕戥傷啲相機及鏡頭.

因為剛剛通宵班收工返到屋企,而早班今日要返09:30,要沖涼及食早餐,
然後上床小睡一小時就要返工,不便多談,要爭取時間休息.

如果今晚唔使返通宵班的話,我才會回貼,否則就要等我休息至可以回貼.

[melon_baby_99]

期待你既"血汗相"

[look_yau]

>>> 期待你既"血汗相"

佢唔 post 相㗎

[hon279973ww]

咁又真係好難分享到marco師兄的作品既。