[hlcmarco]

上個星期,仔仔通知我,話佢喺星期一端午節當日會出戰西貢區龍舟比賽.
叫我請定星期一假去幫佢影相,重可以開車送佢去西貢參賽.
點不知佢計錯數,我係返通宵班嘅,佢在星期一早上七時要集合,八時就要參加初賽,十時就要參加覆賽.
我應該係請星期日假,而唔係請星期一假.

冇計諗,假都請定左,冇得臨時取消.
唯有仔仔自行前往西貢,我七時喺青衣下班,一收工就立即開車趕返屋企,
拎住仔仔幫我執拾好的攝材,就第一時間趕去西貢跟佢會合.

天公都算做美,嗰日天氣都唔算係太熱,對比返早一日星期天的高溫,紫外線強度指數竟高達10,
達到最高級別,真係人都曬得濃,果真不可同日而語.

我約莫喺八時三十分到達比賽場地,哈~,竟然畀我搵到個非常好的頭位拍攝喎,真好彩.
早少少嚟或者遲少少嚟都埋唔到呢個好位,真係冥冥之中有定數.

同仔仔通過電話,佢話初賽已完,佢稍事休息,在十時就要參加覆賽.
佢問左我位置,轉過頭來佢已行到我身邊.
佢好開心咁話我點解咁遲嚟,都可以搵到呢個咁好的頭位.
我話我都唔知,總知我見有好位,就立即二話不說埋位擺陣啦.

佢幫我攞埋個工作證,佢問我是否想入去工作人員的拍攝專用區影相.
我話唔使了,我搵到呢個好位,我都好滿意,唔使用工作證了.

仔仔原來已幫我準備好的攝材如下,我真係睇都冇睇過,我信晒仔仔的決定.
7D配上Canon EF 100-400mm f/4.5-5.6L IS USM,
D3s配Nikon AF-S DX NIKKOR 55-300mm f/4.5-5.6G ED VR
加多支Nikon AF-S DX NIKKOR 10-24mm f/3.5-4.5G ED.
還有兩塊CPL,氣泵和鏡頭筆,DD PRO低通濾鏡吸塵機,鏡頭紙,
單腳一支,長袖風衣,有面罩的漁夫帽,太陽眼鏡,太陽油,蘆薈補濕啫喱,飲用水一樽.
仔仔果然夠細心,裝備一應俱全,完全令我可以無後顧之憂.
我係一個攝影獨行俠,獨斷獨行,自由自在,無拘無束地享受幫仔仔拍攝的樂趣.
7D配大白,相對焦距有成640MM,尚算夠影.用埋支單腳,就更加輕鬆自在.
好彩仔仔唔係幫我準備三腳架,人太多了,好難開到三腳架的.

十時三十分,仔仔比賽完畢,我亦算影完,執拾裝備離場,但仔仔要開會,我就返屋企整理相片,然後備份至相片伺服器內.
發覺支大白果然靠得住,但係支Nikon AF-S DX NIKKOR 55-300mm f/4.5-5.6G ED VR都算係幾弱下.
唉!一分錢一分貨,重想點吖,支大白HK$12,700,支NIKKOR 55-300mm f/4.5-5.6G ED VR只係HK$2,850
價值相差接近一萬元,佢有返咁上下表現,都算可以叫做交到差.

下午一時左右,仔仔返到屋企,在相片伺服器下載相片嚟睇.
NIKKOR 55-300mm f/4.5-5.6G ED VR弱就真係弱左少少,算數啦,仔仔都收貨.
支大白啲表現,仔仔好滿意,我亦可以功成身退,立即沖涼上床休息.

端午節,都叫做影下龍舟相,應下節,一為神功,二為弟子;一次過可以滿足到兩個願望,都算有賺囉.

[crazysam]

難得一天可以享受家庭樂:). 等我出年都去影下龍舟相.

[hlcmarco]

crazysam師兄:
我個人以家庭樂為首要,個人享受則較為次之.
我那天剛剛返完通宵班,由19:00至07:00,做足十二小時,
我收工都已經很攰,但仔仔開到聲,我點到會支持的.

仔仔由佢入讀觀塘職業訓練局學習攝影開始,佢年年都有去影龍舟相.
所以佢知道晒影龍舟相係要拎邊啲攝材裝備,完全唔使我操心.

總之我拎住佢幫我執拾好的背囊,總來都冇話有所欠缺.
我倆仔爺好好感情,大家好似朋友一樣,冇隔膜,冇代溝,
大家有傾有講,有事可以坐低商量,大家有共同嗜好,
我可以睇佢拍攝所得的相片,去了解下佢嘅內心世界.

d2°c師姐:
唔好抦我啦,我不貼相,是個人意願,不得強求.
影相討論區,唔係一定要貼相的,亦可以用文字去交流.
其實貼相有何難?把拍攝心得、裝備,用文字去演繹才更為困難.

莫道筆墨無斤兩,猶如千軍萬馬藏.

師姐有否睇過金庸的小說,文字的威力,何見一班.
小說中的千軍萬馬,氣勢磅礡,比起動畫和電視劇集,不知要勝多少倍.

我唔鍾意食粽,你郤鍾意食粽,就可以知道,十人生九品,各取所需吧.
我係唔會因此去抦師姐妳的.

[alexchoy26]

hlcmarco C兄,
睇你啲post簡直可以當小說睇! 純文字連插圖都無! 佩服!!

[AlvinMak]

hlcmarco ching,

Excellent article and I enjoy reading it very much.

For some one who said you shouldn't post it without pics, just ignore her.

After reading what you wrote, it will be great if we can see the photos you took.

[pigpig2000]

我越南呢邊晒到傻，
淨係日落後先敢出街。 >_<"

[hlcmarco]

alexchoy26師兄:
我享受拍攝的過程,遠勝享受拍攝的成果.
用文字去表達享受拍攝的過程,比貼圖更為困難.

AlvinMak師兄:
享受閱讀的樂趣,比用肉眼去睇相的樂趣更為深層次.
我都有講過,貼圖一點亦不困難,只不過我係對貼圖有點抗拒.
既然非我所願,唯有明言在先,就如羌太公釣魚用直鈎一樣,願者上釣,不會強求.

pigpig2000師兄:
上個星期六晚,前度女友約埋班朋友叫我收工到東坪洲相.
我都一樣係來者不拒,照樣應承,咁我星期日早上七時一收工,
又係同樣開車趕返屋企,重要自己執拾攝材,然後出發.
但係去到碼頭,真係曬到頂唔順,佢班姊妹大嗌救命,話曬死人,
影完返嚟,要敷幾多塊美白面膜至補得返數,結果取消行程.
我一樣冇所謂,結果就去左旺角東站八樓的鴻星飲早茶,
好很貴,四個人,食啲咁多嘢,埋單都要$190.3元,我豪埋比佢,二百元唔使找.
話過以後都唔會再去鴻星飲早茶.
飲完早茶,班姊妹就各自鳥獸散,我就剩係送佢返屋企.

由於飲茶的時候,我已昏昏欲睡,頻頻釣魚,佢怕我開車唔夠精神,容易出意外,
佢叫我上佢香閏稍事休息,結果去到佢香閏,立即沖返個涼,倒頭便呼呼入睡.
由於我設定左時間接太太收工,所以夠鐘就起身,趕去接太太收工.

點不知嗰晚仔仔又話翌日要幫佢影相,我都唔敢婉拒,
雖然係辛苦咗少少,但係我一樣係頂得順的.

d2°c師姐:
請息怒,萬事以和貴.
一人少句,不如講下妳食啲粽係乜嘢粽,是自己動手整抑或係出街買啦.

[pigpig2000]

我屋企都有自己粿粽。 ^_^

[pigpig2000]

我重有十幾廿隻 ^_^"

[hlcmarco]

pigpig2000師兄和d2°c師姐:
我個人較為實際,亦即係人哋叫現實.
自己去包粽?個人認為:我啲時間咁寶貴,我返工賺錢買粽重好過自己慢慢包.
我自己又唔識包粽,越俎代庖,吃力不討好.

況且我又唔係咁鍾意食粽,端午節,影下龍舟相,就當應咗節就算.

嘩!重有十幾廿隻剩呀?咁豈不是有排食,要食好多日喎,會唔會食到驚?又或者會唔會食到滯呀?

[look_yau]

>>> 話過以後都唔會再去鴻星飲早茶.
鴻星好差，我都有好長時間冇去過

[jmD300]

師姐 has a wife?

[hlcmarco]

look_yau師兄:
其實鴻星啲嘢都唔係咁好食,但係個價錢就真係實在太貴.
我哋四個人,都係象徵式食少少嘢,完全沒有半點飽字可言,
埋單都要接近二百大元,如果真係要食到飽一飽的話,我諗五百大元都未必可以落到樓.
價錢太唔合理,我去另一間飲好過.

d2°c:
都唔敢尊稱您做師兄好,抑或係師姐好.
您個性別,簡直存疑.
再講,您有時真係前言不對後語,令我總覺好有保留.
我重好記得,您話係攞綜援嘅,攞綜援可以攞到有菲傭,您真係得囉.
您又話好多好多年前讀過大學程式編寫,起碼學歷不淺,
但係我點睇您的文筆,錯漏百出,白字別字錯字同音字,多如天上繁星.
一個有學歷嘅,又點會可以容忍到自己寫啲貽笑大方於人前的文章呢?
就算係我呢啲咁嘅低學歷,幹粗活的人,都會執著一點字眼啦.

唔知點解,腦海中怱然出現"木蘭辭"以下幾句:
《開我東閣門,坐我西閣床,脫我戰時袍,著我舊時裳;當窗理雲鬢,對鏡帖花黃.
出門看火伴,火伴皆驚惶:「同行十二年,不知木蘭是女郎!」
雄兔腳撲朔,雌兔眼迷離;兩兔傍地走,安能辨我是雄雌?》

火伴:同伍的士兵,古代兵制十人為一火,火長一人管炊事,同火者稱為火伴.
現在泛指共同参加某種组織或從事某種活動的人,習定俗成寫作伙伴或夥伴.

[hlcmarco]

昔日以身作則教導兒子學習倉頡輸入法,兒子極度抗拒.
又話難,又話慢,又話辛苦,總之就理由多多.
但經我細心教導,諄諄善誘,導佢返回正途.

今時今日,兒子亦可以叫做略有所成,練得一手"我手寫我心".
佢對錯別字都係好抗拒,寧可慢,不可錯.

先學好,後學快;絕不能本末倒置.

曾經在聽聽少年心底話的時候,兒子好語重心長的向我說:
「好多謝爸爸多年來的教導,以身作則,令我獲益良多,最想向爸爸講聲多謝的,
就係爸爸教識我倉頡輸入法和手機短訊的筆劃輸入法,令到我可以我手寫我心.」

[wonder_land]

My salute!