文：本香猛
天性使然，是男人都愛推車，推玩具車，所以擁有一架合金車仔，往往是男人的浪漫。車仔坊間有許多，由 TOMICA 的 City Turbo 到英國模型公司 Amalgam 的拉利林寶，選擇何其多。不過，講粗豪講霸氣，去年成立的 Diecast Master 才是 Man 中之霸。事關款款產品均攞正大型工程車 Caterpillar Inc. 的「拉臣」推出，即使縮至 1:50、1:87，甚至 1:125 比例，架架「車仔」依然份量十足。
今年品牌又有一系列新車型推出，一如過往標榜「Scale Model Replicas」，即無論比例、鑄色、細節都跟真車無異，並如實印有「CAT」商標，等閒山寨廠根本無從抄襲。新車包括不少現役工程車，例如 335F/390F 挖掘機、M318F 輪胎式挖土機、D9T/D11T 履帶式推土機、910K 裝載機、CT681 貨斗車/混凝土攪拌車、793F 採礦車及 18M3 平地機等等，不能盡錄。全部型號均設活動機關，除車輪可以轉動能夠推前推後外，機械臂、貨斗、履帶全部可動，部分型號還附上同比例「地盤佬」一個，像真度無得輸！
Diecast Master 另一「屈機」處是包裝，大部分產品均採用全彩色印刷金屬鐵盒及高密度珍珠棉，前者印有該款模型及真實工程車的相片作對照，並附有車輛各項技術規格，研讀至啱！更矜貴的還有豪華禮盒包裝，附有鏡面展示台及古銅金屬蝕刻名牌，當中 D11T 履帶式推土機更全車經過鍍銅處理，將「佬味」玩具升華至藝術品級別。
Diecast Master 部分型號已有代理返貨，售價由 HK$199起。
