文：本香猛
就算你唔係高達迷，細個一定聽過阿寶同馬沙，這對高達世界的神級宿敵，即使今時今日依然擁有極高人氣，只要一旦商品化，無論大與小、模型或者完成品，例必被高達迷秒殺，個個畀完錢再呻「人類總要重複同樣的錯誤」，可惜已經太遲！
而相比起阿寶，亦正亦邪的馬沙相對更人性、更「貼地」，難怪連高達之父富野由悠季也曾經表示，若要選擇一個最喜愛的角色，紅彗星馬沙是不二之選。多年來馬沙的相關產品極多，G-Shock、墨水筆連汽車都出過，但講像真，還是玩具勝一籌。新近日本 Megahouse 便宣布將於今年 9 月推出「Gundam Guys Generation」系列，繼前年 1:8 馬茜後，再推出同比例馬沙雕像，讓他們兩兄妹在現世界再度重聚。
暫時所知，此雕像將提供灰模及彩辦兩個版本，但無論何者，頭雕、身形及神態均相當高質，頭盔 Look 配以經典奸笑，再加上帥氣甫士，完全將安彥良和筆下的角色立體化出來。細節方面，從早前宮沢模型會的試辦所見，雕像的頭盔經過光油處理，在燈光下有微量反光效果，同時全身上下塗有標誌性的馬沙紅色，配合金色凸面設計的自護軍徽號，像真度相當高。
此雕像另一賣點是換件設計，相比起市面其他馬沙玩具往往只有一個頭盔 Look，Megahouse 額外提供面罩配件，並附送一件拿著頭盔的左手配件，簡簡單單就多個造型玩！售價方面，未連稅賣 10,000 日圓，折合約 HK$713，貴過唔少 MG，但馬沙喎！貴一貴都要買啦！
