文：Tony Lam
為旗下型號推出限量特別版永遠有價有市，既然 M4 CS 成功，無理由唔出 M3 CS，寶馬當然深明此道！有錢搵唔通唔要？先前覺得 M4 CS 得兩隻門唔方便的住家型男，今次 M3 CS 唔買仲等幾時。
寶馬 M3 早已是車壇神話，不論任何年代車型喺車迷心目中都係咁正，今代 M3 所配用嘅 3.0 公升直六雙 Turbo 引擎，可發出 425 匹，靜止加速至 100 公里只要 4.1 秒，性能絕對與不少跑車睇齊。不過，馬力嘅嘢冇人嫌多，所以廠方亦不斷加推不同版本，每次加少少馬力，賣貴少少，車迷又買得歡喜，何樂而不為。
所以，繼早前 M4 CS 挑起晒班車迷條根後，M3 CS 今天亦正式推出，繼續以輕少少、快少少、貴少少再加埋限量發售呢條方程式打造。動力依然係 3.0 公升直六雙 Turbo，不過馬力就去到 454 匹，峰值扭力 600 Nm，靜止加速至 100 公里 3.9 秒，成功突破 4 秒大關，亦令 M3 CS 成為歷來最快 M3。外型方面，原來嘅 M3 已經相當爆肌，Man 到震，所以 CS 版本只見到少少改動，頭泵把下面可見多咗條碳纖頭唇，尾翼同尾喉再進取啲，四隻 Michelin Pilot Super Sport 輪軚分別係前 265/35 R 19 及尾 285/30 R20，確保時刻都可以緊咬地面，四百幾匹馬力唔會浪費。車廂就可以見到 Silverstone / Black 雙色真皮配 Alcantara，輕量化 M Sports 桶椅及M Sports 軚環等。不過，寶馬只會造 1,200 部供應全球，香港到時返到幾部真係唔知，有心買好應該早啲去代理落訂。
