汶萊小記3 - 首都景點一篇睇哂!

講完交通講完住宿，係時候講下汶萊呢個傳聞無野玩既地方究竟有咩玩啦~



1. Omar Ali Saifuddien Mosque (奧馬爾•阿里•賽義夫丁蘇丹清真寺)

唔使諗，市中心最觸目就係佢!

全白色金頂既湖上清真寺，係汶萊最出名既景點兼最重要既地標! 更被譽為亞太地區最壯觀的清真寺之一!

基本上係碼頭邊離遠已經可以感受到佢既宏大氣勢!

之不過………我發現左自己出現一個大問題…….

去完伊朗之後我覺得所有清真寺都平平無奇呀!!!!!!!!

大鑊啦!! 繼教堂麻木症後又奶多樣野啦!!!!!

沿清真寺湖邊路行出去，係個新建成既休憩公園

都幾靚ge，仲可以略高既遠處望返全景，值得行下~

全日既天氣都陰陰沉沉，睇怕都無日落睇ga啦

正當我走人時，再經一經過Omar Ali Saifuddien Mosque……..等等先，點解成個feel會唔同左ge?

旅行人既直覺話我知，一般好強既氣慢慢逼近

突然天色一轉，光線從彤雲中突破缺口，將整個天地照成紫紅色

而山雨欲來前的寂靜，使湖面波平如鏡，瞬間把真實與虛幻的世界二合為一

不錯，在那紫色晚霞中，出現了兩座亮著綠黃燈光的清真寺……我係咪去左阿拉丁既世界呀?.......

 

有無真係太過份ar?????

呢個景靚既程度係我呢d影相白痴都可以零執相齋禁掣有咁既效果wor! 真係the whole new world啦!!!!!

之後睇返google既相片，幾乎清一色都係清真寺水中倒影，似乎呢種風景都唔係咁難出現，我認為係汶萊必到既景點呀!

 

2. Kianggeh Market

汶萊著名既本地市場，賣既以本地農產品為主，包括有狼牙棒咁既菠蘿同青過我塊面既香蕉，簡單嚟講即係一個屋村街市，連大細都差不多

呢家野，有興趣就會有興趣，無興趣就會無興趣，睇下閣下了~

提提大家呢處多數下晝1點就會收檔，同埋坐水上的士都可以直到的

3. 騰雲寺

汶萊唯一的中式寺廟，對於外國人嚟講係好有特色，對於中國人嚟講係睬佢都生積

如果想試下係外國求簽個結果會唔會好d既話，都可以去下ge

至於我……….由於佢係Kianggeh Market正前面，快速影兩張相再入去行個圈就算了，5分鐘有多~

4. 郵局

其實唔係咩景點，之不過難得一場嚟到咪寫幾張post card比friend law

千其唔好話比佢地聽我係為左入去涼冷氣先寫ga

btw, 郵局d post card極度極度核突，係核突到職員都叫我自己出去買算了

5. Radisson Hotel後山公園

呢個係某篇遊記睇到的，聽聞係斯里巴卡灣市內唯一的郊遊徑，可以望到市內全景

但under呢個會燒到變脆皮燒肉既陽光下我一d變成BBQ既意慾都無，影條路比大家就算了

6. Sultan Haji Hassanal Bolkiah Silver Jubilee Park

為慶祝蘇丹牛一而開放比市民既皇家公園，又係太過熱唔想行影張相就算……..

…………………………………………….

Wei阿鋒你好似越寫越hea咁ge………

得~~~~~~下個地點一眾女士一定好有興趣!





7. 吳尊麵包店Bake Culture

唔係小背心李彩樺果種吳尊! 係真係台灣超靚仔果個吳尊ar!

而間鋪係身為汶萊華僑既佢開ge，就係因為呢個名氣，令佢由一間普通既麵包鋪變身為人氣爆燈既食店!

原本我都無打算來的，點知我又真係咁岩行過wor，加上我大學時綽號「教院吳尊」(但無人叫過)(https://goo.gl/U9dW3p)，一場行過點都要嚟會一會個真身ge~

呢間Bake Culture 樓高兩層，地下係麵包店樓上係café shop，定位同A1 café果d差不多

原本都想坐下飲啖茶食個包ge，但上層已一早坐滿一班嘈怨巴閉既大陸mk (一聽口音就知，台灣普通話好唔同的)，唯有係下層買個包涼下冷氣算啦~

個包方面係估唔到幾好食的，口感鬆軟之餘亦有麵粉香味~

蛋榚雖然無食過，但絕對係外貌協會高層人士

價格則大約同A1 and Panash差不多，接受到ge~

如果幻想店內有d咩阿尊既相片或紀念品既話，恐怕大家都失望了

就好似我兩年前去到三重縣松阪市以為周街都會係我女人既相一樣，係平平淡淡乜Q野都無ga! 店內最多就只有另外幾位台灣男星既手印

不過大家都唔使太灰心ge~

有我「教院吳尊」既自拍照支撐住，一樣可以給大家一個凍冰冰既夏日~~~~~~~

8. Jame Asr Hassanil Bolkiah (博爾基亞清真寺)

全汶萊最大兼最新既清真寺。

係現任蘇丹博爾基亞下令所建，1994建成，即係我仲老過佢10歲，但佢明顯肥我好多，只個停車場都有維園咁大! 皆因每個星期五蘇丹都會嚟呢度拜神，而有咩全國性好大既宗教儀式都會係度進行

你諗下，汶萊人個個渣車，點可能唔整個加州迪士尼咁既停車場呢

呢間清真寺……..講真係ok的，又新，又大，又壯觀，個屋頂仲要用24k真金製造，又豪又奢侈，但我影左既相真係少之又少……

首先係我行錯路兼天氣太熱唔想慢慢再搵正門，所以我係側門入去，錯過左最佳既影相位

其二係呢間清真寺亦都有返咁上下大，所以除左航拍外要影全景都真係有d難度

其三係寺院內部禁上拍攝

其四亦係最重要既一點 :　男人都要笠住件黑色抖縫呀!!!! 36度要扮佛地魔呀!!!!! 咩精神都無只係想快d睇完快d走啦!

不過話返專頭，果d夏天日日都要全身披黑既女士其實仲慘……當係感受下佢地既辛苦啦……

以上就係我係斯里巴卡灣去過既既景點~

特別提提大家，其實上面既1-8係次序來的，岩岩好一條順路行哂，大約用左4個半鐘啦，由於首都最多都係油尖旺大小，絕對可以11號車攪掂哂

其他景點就仲有 :



紅樹林 ----- 1個鐘攪掂，民宿主人Andrew話唔睇都無所謂

加東夜市 ----- 純粹一個food market，夜晚開，無車的話要行一個鐘

皇宮 ----- 一年開得一次，否則只可坐水上的士去外面兜個圈

汶萊皇家博物館 ----- 聽聞好奢華，但我真係無乜興趣

(汶萊皇家博物館 ，門口行過only)



而其他去National park or油井的tour都係又遠又唔太吸引

最後大家就會發現，汶萊真係一個無乜野睇，有待開發旅遊資源的地方，急的話一日睇哂真係有突的…………



又未使咁灰住，前兩篇都提過，有一個汶萊好有名既地方我仲未寫

因為佢，我先覺得今次汶萊之旅不枉此行

等等先.......又話一篇睇哂???

因為下篇無啦啦又寫到水蛇春咁，開另一章大家無睇得咁辛苦ar......何況果度勉強嚟講都唔算首都範圍........

好啦~總之下回有靚相睇呀~

====================



Email : funggarcia@gmail.com



Instagram : https://www.instagram.com/fung_garcia/



My Facebook Page : www.facebook.com/Garcia.in.German



Medium : https://medium.com/@funggarcia