中環大館重開之後，變成熱門文青打咭勝地，同時亦係近來小編試機試鏡既熱門首選。早幾日小編再訪此地既時候，就親眼目睹一個打咭奇景。
小編喺熱門拍攝地點B倉同C倉出面時，見到一對後生情侶喺附近打咭影相，其實主要係個男仔拎住部小型單反幫個女仔影相。本來就好正常，但係個女仔似乎對攝影好有要求，不停喺度指揮佢男友(或者係兵)走來走去，擒高擒低。身形有少少肉地既男仔雖然行到有少少喘氣，但總算係有求必應，小編覺得算係唔話得。
去到監獄長樓門口又撞返佢地，個女仔似乎仍然意猶未盡，仲想喺度影多啲，但係呢個moment就出事喇。
女︰做乜放我個袋喺地下呀?
男︰咁我要幫你影相無手拎袋丫嘛!
女︰(勁惡) 你可以將個袋扣住欄杆家嘛! 整到污糟晒係咪賠返比我先?
男︰(擰轉頭做左個作嘔樣)
(影左幾張之後，個女仔拎返部相機睇相。)
女︰做乜我對腳擺到咁肉酸架?
男︰咁再影過囉…
女︰你影相果陣睇住個芒，你唔識提我架咩?
男︰我係唔識影相架喇! 你咁鍾意影，你自己影飽佢啦!
個男仔跟手塞返部相機比個女仔，之後就頭也不回咁走左去。其實影相打咭只不過係拍拖既其中一個活動，點解大家唔可以「關係先決」，好聲好氣呢? 無靚相最多打唔到咭，無端端無左個男友就真係唔抵喇!
P.S. 小編唔係有心偷聽佢地，不過佢地講野真係幾大聲，周圍既人唔想聽都會聽到。
----
如果大家想提供有趣既攝影相關故事分享比大家，歡迎 inbox 比小編，或者 email 去 info@dcfever.com，多謝收看!
