影靚相打咭可以講話係男女都鍾意既活動,不過講到課金upgrade器材,根據小編既非正式統計,似乎都係男性比較熱衷。單身人士就話自由自在,鍾意買乜就買乜。不過結咗婚之後,D錢就唔係淨係自己駛,好多時買嘢都要得到老婆大人批準。
小編有個老友比較麻煩,佢老婆批budget批得好緊,每次買嘢都要準備充足理由,幾乎要寫埋proposal申請,所以佢換相機買鏡頭都算係幾少有既大事。最近佢whatsapp同小編講,話想入返部富士 X-T3,叫小編問下 shop@dcfever 既同事有無友情價比佢咁話。
小編諗起佢上次買嗰部X-T2都係2016年尾既事,兩年咋喎,佢老婆咁快就批準佢換機咁好?
老友︰X-T3同X-T2個性能就話差好遠啫,個樣幾乎一樣咁滯,我老婆應該唔識分架,買完偷運返去換左佢就掂啦!
小編︰你係咪真係sure佢唔識分架?等陣佢發現你偷買相機,我驚你以後無得影呀!
老友︰我問人借咗部X-T3返屋企擺咗幾日出黎,佢都無問我係咪換左機,佢真係分唔到架!
小編︰你真係幾穩陣架喎!不過張單有日期,你記得收好D呀!
老友︰呢D野唔駛教啦!買機用自己私己錢比埋cash,咁就唔怕比老婆check月結單穿煲啦!
有錢就身痕想買嘢玩,相信都係唔少男人既天性。而且去二手區放返部舊機出去都收得返幾千蚊,補返差價都唔係咁貴啫!當然小編希望各位玩相機既老友,可以同屋企人有商有量,唔駛買部相機都搞到好似偷情咁啦!
----
如果大家想提供有趣既攝影相關故事分享比大家,歡迎 inbox 比小編,或者 email 去 info@dcfever.com,多謝收看!