格魯吉亞背包行Day2.2 - 公共浴場奇異見聞錄

 

續上回行到隻積咁，但仲未完，下個目的地係山上的女神像呀!!! 纜車係果邊~~~衝ar~~~~~~~~~

等等先……….對腳好似……有d軟wor……..

一般嚟講腳軟唔係我style，之不過我好似由12點到而家6點連續行左6粒鐘無坐過，平時又缺乏女朋友shopping訓練係咁ga la

好啦! 臨時改變行程，過橋行去對面浸溫泉啦~~~~~~~~~~

 

 

 

---

 

 

 

 

 

 

Tbilisi呢度以硫磺泉Sulfur Bath為主，又係老生常談果d「對皮膚身體好好呀~」既功效啦，個個溫泉都係咁講ga啦，唔深究~

對大多數朋友嚟講，重要既係溫泉既外貌、裝潢、氣氛同價錢~

從外觀睇，第比利斯溫泉區係泥土中突出的一個個半圓頂，有點Star War feel，同伊朗Kashan的古土耳其浴場Sultan Amir Ahmad Bathhouse既屋頂非常相似 (個人覺得伊朗果個靚d)

 

 

 

 

不過最有名的一間浴室竟然係清真寺????

開頭我都好懷疑，到入去見有旅舍咁既reception先知原來兩者係合而為一的!

好啦就睇下你個溫泉有幾正~~~~

「sorry we are fully booked for these 3 days」

……………………………………………………

即係咁………我係富山浸唔到已經非常唔gur ga la ……..d黑氣可否唔好由日本帶到嚟呢邊呢…….

 

(唔講既話，鬼估到呢個係溫泉屋咩............)

 

再行遍整個溫泉區，每一間都話full哂!

原來呢度既溫泉係以獨立房既形式使用，加上遊客越來越多，所以接客速度不快兼價格偏高，一間房大約係50 gel左右

唔係掛…….一場嚟到又無得浸??

入到最後一間"Bath No.5"問，職員既答案係” Private or Public?”

有公共浴場咁好!? 幾錢先!

“ Private is 45 gel, Public is 3 gel”

“Woo~~~~~~~~~~~~~~~~~~~~”

個woo字唔係我把口而係我背脊發出，擰轉頭望一望，使唔使咁多人係我後面打蛇餅呀~~~~~~ 可想而知有幾多人同我一樣想浸無得浸搵緊溫泉浸ar~~~

由於用一串魚蛋既價錢嚟浸溫泉實在太吸引~ 反正都慣左同外國人比大細了(I mean肚腩)，就咁話啦~

睇怕會寫第比利斯公共浴場報告既香港人up to now只得我一個啦掛~~~~~~

 

(就係最近河邊呢間)

(裡面唔比影相，呢張最盡ga啦)

 

我原本諗住呢個樣子偏舊既公共澡堂就算無Kashan果個咁靚，應該都會同布達佩斯既Kiraly Baths差不多掛

果然，我太天真了

首先更衣室係一間昏暗房間內置有十來隻殘破鐵皮櫃，感覺就係美國舊軍營果d sir yes sir更衣室!

另加濕淋淋好易pk階磚地板及一群全裸毛茸茸格魯吉亞腸仔...... 仲要我一入到去就比班人整蠱.........

我某d朋友唔該抺下d口水先plz

 

(網上示意圖)

 

全裸入內，只見約400呎的狹長空間，牆身呈灰灰黑黑，由不足50w的燈泡和圓尖屋頂的天然採光維持視線 ;

正中間放有一大張石椅，似乎係比人坐但無人會坐，因為放滿哂洗頭水淋浴露 ;

圍繞石床的頭頂有一環形水管，小便般流下10條小水柱供人沖身之用 ;

房間盡頭係一個日本錢湯大小的熱水池，水色混濁黃甘甘，正常既~硫磺泉嚟嗎;

另一邊則放有幾張石床，如匈牙利所見一樣係比人訓覺休息或按摩用

 

(google極都搵唔到浴場裡面個殘樣，剎時間又用唔返AutoCAD，唯有用小畫家頂住先! 畫左我半粒鐘，好辛苦ga! 支持下啦~)

 

至於用後感……………………..點講好呢，真係好奇妙……..

浴室內空氣不通非常悶熱，昏暗破爛令人有污糟的錯覺

成群裸體大男人係環狀水管下沖身，更令我有吊住條友酷刑拷打既感覺，一大班麻甩佬赤身吵鬧更令我敬而遠之……

望下左邊，做乜有條友企定係個office垃圾桶旁邊郁下郁下ge?.............

wa佢剃毛呀!!! 仲係剃陰毛!! 陰毛呀!!!!!!!!

士多啤梨蘋果橙你個豬頭炳! 呢d野返屋企一把火燒左佢做Yakitori算啦!!!

見到佢係咁將揪提子囉起放低推左反右真係眼都冤!

頂唔順，去桑拿房避避先!

一開門 ------- 3層坐滿人，何其壯觀呢! 唔係歡樂滿東華係唔可能劏房size逼到十幾個毛茸茸彪形大漢ga!

喂呀……….呢個場究竟想點ar……但又無理由一入嚟就走ga，點都浸多陣抖下la……

(Sorry我真係諗唔到用咩相，將就下啦!)

(好野，梗係要睇多次~)

 

講真呀，呢度真係好似電視上古代奴隸既集中洗浴場….. 不過我都係奴隸，金錢既奴隸嗎………

不過，真係好奇怪，浸下浸下，慢慢我反而覺得呢d面貌有其可愛之處~

聊得興高采烈既猛男，帶埋小朋友嚟浸既爸爸，去完廁所唔洗手既華哥，全部都係格魯吉亞人既日常生活寫照!

只有呢d地踎到爆既地方先可以令人真正體驗到當地人既生活文化，就好似去日本local既錢湯咁，可能又殘又舊，但又別有一番風味呢~

順帶一提個熱水溫度岩岩好，好正ar~~~~~~~~~

 

 

 

由起初我是拒絕的，到走時非常滿足，溫泉既魔力真係神奇~ 下次過幾日再返嚟第比利斯一定要試埋其他先得~

好啦~ 叉足電，又可以繼續上路，向山頂女神像進發啦~~~~

 

下回繼續~