文：本香猛
男人愛車，但真車並非人人買得起，香港地買得起也養唔起，所以唯有將愛轉移至玩具車仔，君不見日本車仔品牌 Tomica 的產品一直深受歡迎嗎？而除了 Tomica，專門推出軍事組裝模型的青島文化教材社（Aoshima）近年亦向「車壇」進發，並顆拍鈴木 Suzuki 出過多款經典車仔，最新作是今次介紹的 Jimny 第四代越野車。
全新第 4 代 Jimny 自發表便掀起全球訂車熱潮，香港市場也不例外，據說現在下單也要等超過一年才有車。青島這款扭蛋就讓車迷望梅止渴，車身縮至 1:64，全長約 50mm，約火柴盒大細。全個由 ABS 塑膠製作，並有鈴木廠方認證，因此保留了原車多個設計元素，例如方正的車身線條、直柵式面罩、圓形頭燈等，賣相的骰可愛。車頭更配備越野款式的啞黑前後泵把及輪拱，越野味勁出！
原廠提供的車身顏色有 8 種之多，扭蛋提供當中 5 隻色，包括 Kinetic Yellow、Jungle Green、Brisk Blue Metallic、Superia White 及 Medium Grey。扭蛋現已上市，每扭一次要 300 日圓（含稅），比起真車賣 20 萬港元當然平好多。然而，一分錢一公貨，雖然玩具車是三門設計，但就打唔開，若將來改良版可以打開兼加裝配件的話，就如真車一樣玩味十足了！
