文:本香猛
《海賊王 One Piece》動畫播放 20 周年,聯乘慶祝產品數埋有一千幾百種,只不過好多都是求其印過嘜頭就想叫人課金,未免太大貪!相比起來,由 PUMA 與之聯乘的紀念波鞋就有誠意得多,第一彈 CELL Endura 早於 8 月推出,以千陽號為主題,Fans 讚多過彈。最近輪到第二彈開售,比上次更矜貴更搶眼,認真到估佢唔到!
《One Piece》原作者尾田榮一郎出晒名唔理漫畫外的事,攪到周邊產品良莠不齊,PUMA 始終是大牌子,出手總有一定水準。今次聯乘波鞋以 90 年代經典 Cell Venom 作為鞋款,IMEVA 中底及 LQDCELL 鞋底本身已具有極佳緩衝感,Daddy Shoes 外型亦食正潮流。不過最正還是它的主題「TREASURE HUNT」,全對鞋用了金銀撞色,鞋面印有路飛草帽花紋,鞋面配有金色鎖匙及金色鐵鏈,寓意鞋主有力開啟寶箱成為海賊王,相當有心思!
有心思的仲有鞋籠,兩塊鞋墊拼合起來便是《One Piece》內的偉大航道,上方標記了故事中出現過的名場景,熟書的話一定記得。鞋盒則沿用第一彈設計,印有娜美、山治、羅賓的黑白肖像,靚還靚,但跟今次的金色鞋款唔多夾,若連鞋盒也用金色就更加完美。
此聯乘波鞋已於 10 月 11 日在日本發售,賣 19,800 日圓,折合約 HK$1,432,有興趣的話可到以下官網購買:
https://bit.ly/2J5F8ow