文:本香猛
萬聖節剛過,但人間比鬼域更恐怖,不如睇番套卡通調節一吓心情。新電影《愛登士家庭》動畫版上映,戲中黑色幽默現在看也不過時,而且角色造型騎呢怪誕,不但叫觀眾留下深刻印象,還是玩具的上佳題材。美國品牌 MEZCO 旗下「5 POINTS」系列就借此推出一系列可動人偶,冚家買齊擺出來都幾過癮!
《愛登士家庭》最初是由 Charles Addams 為 New Yorker 創作的連載漫畫,1964 年拍成電視劇,90 年代又被改編成 2 套真人版電影,相隔 20 幾年今年再獲拍成動畫。今次介紹的可動人偶早於今年 SDCC 曝光,成員包括爸爸、媽媽、一對仔女、肥叔叔、怪管家、嫲嫲、全身毛親戚 IT 及寵物「阿手」,塗裝還原戲中人的蒼白膚色,三尖八角造型跟足,服裝也神還原,媽媽 Morticia 穿上歌德式長裙、女兒 Morticia 紮孖辮、細佬 Pugsley 身披間條囚犯衫等。另有,「阿手」有四個手型之多,例如蹺起食指、畀 OK、五指撐起及經典的撻手指,令人不禁想起其洗腦主題曲。
雖說是可動 Figure,但人偶主要得雙手及頭部設有關節,總體來說擺好過玩,相信若改成鐵線公仔會更好玩。售價方面,一組三個角色賣 US$25,全套 Complete Set 共 12 個公仔就賣 US$85,預計 2020 年 2 至 4 月開始發貨。