文：本香猛
將街機帶回家是好多 70、80 後的童年夢想，但先要解決錢及土地問題，即使解決了，現在要找一台完好無缺的街機可謂非常困難，例如數年前本香猛就遇過兩台 SEGA 街機放賣，一台是 New Astro City，一台是後繼機 Blast City，可惜壞屏兼投幣位有香煙燒過的痕跡（流連過機舖都應該記得點解），所以最後打消了購入念頭。誰不知今天竟然又畀我有機會入手，皆因 SEGA 竟趁着60周年大日子推出Astro City Mini，外型不變只是大幅縮細，睇得又打得，唔買實在對唔住自己！
根據官方資料，這台 Astro City Mini 是根據 1993 年版本打造，沿用樹脂作為機殼主要材料，招牌白色機身、青色按鍵、Joystick 及機頂 LED 燈條全部得以重現，只是比例上降至 1:6，尺寸只有 130 x 170 x 170mm，單手就拎得起，方便玩家帶到邊玩到邊。屏幕有 3.97 吋，彩色顯示，嫌睇得辛苦可經 HDMI 輸出至大電視，而機身又同時提供兩個 USB-A、一個 micro USB 和一個 3.5mm 耳機插口，用「尿袋」就推得郁，又可購買專用手掣雙打，重溫昔日機舖兩個人「排排坐」的有趣場景。
遊戲方面，官方指會預載 36 款經典遊戲，暫時曝光的有 10 款，最出名是當年紅極一時、全 3D顯示的格鬥遊戲《Virtua Fighter》，另外又有橫向動作類《戰斧》、《戰斧 2》、《獸王記》等等，齋睇陣容暫時唔覺得超吸引，期待會有更多名作如《Daytona USA》、《Virtua Cop》等加入，即使無畀隻《Dead or Alive》我都收貨了！
Astro City Mini 售價 12,800 日圓，折合約 HK$928，預定今年 12 月推出，專用 USB 手掣則賣 2,780 日圓，折合約 HK$201。
