文：本香猛
今時今日玩具市場成年人先係老闆，不少神枱級動漫，如今變成玩具都有價有市。70 年代日本動漫起飛，「龍之子」旗下《宇宙騎士》、《再造人卡辛》部部經典，原名「科學小飛俠」的《神勇飛鷹俠》更帶起英雄戰隊熱潮。擅長推出動漫電玩作品的土炮品牌 Storm Collectibles，最近就為一眾 70 後帶來主角大鷲の健的可動人偶。
阿健本名「鷲尾健」，原屬 18 歲試飛員，作為隊長的他除負責統籌全隊行動，必要時也會單槍匹馬擔任前鋒攻擊敵人。然而人氣極高，一身飛鷹裝束又極具時尚感，但以他為題材的量產玩具卻並不常見，較近期又有印象就只有 Prime 1 Studio 的 1:4 雕像。今次 Storm 推出更罕的可動人偶，採用廠方最擅長的 1:12 比例，並一改以往「大隻=靚」的設計美學，阿健 Body 有肌肉的來卻不失線條美，是同廠製作較自然的一款作品。
官方沒有披露關節數目，睇圖頸部、膊頭、手肘、手腕、腰腹、大小腿以至腳掌均設有關節，可擺出單腳企、飛躍、起手等帥氣甫士。頭雕則一貫質素，坦白講神似度未算太高，表情甚至有點呆板，當然茶餐廳盆菜t你不能要求有酒店水準，個人就絕對收貨。配件方面，共有 5 隻手掌、2 個表情可以替換，又有兩組隨身武器「鳥形迴力標」跟畀大家，而阿健件招牌披風更有垂下、半張及全開 3 個造型，英氣十足！
此作現已於官網開訂，賣 US$90，折約 HK$700，預計 2022 年第 3 季派貨。
