文:本香猛
70 年代機械人動畫百花齊放,《大鐵人 28》、《鐵甲萬能俠》、《三一萬能俠》套套經典,其中後兩者時至今日依然有勁多玩具出。最近港產 Action Toys 就以「MINI ACTION」之名重新包裝 Mazinger Z,價錢唔高但神似度高,一齊睇睇!
Action Toys 並非首次推出鐵甲萬能俠,旗下 HEAVY METAL 及 ES 合金系列都出過,今次以「MINI ACTION」系列包裝,賣點是 Size 只有手掌大細,激細隻靈活度卻不低,由頸部、膊頭、手肘到雙腿都偏佈關節,雙手更可屈曲 90 度,輕易做出鐵甲飛拳、舉高兩手等動作。另外腳掌似乎亦內藏關節,擘開雙腳紮馬依然企得穩,陳列時就毋須外加地台咁突兀啦!
元祖鐵甲萬能俠叫作「鐵之城」,機設亦如同銅牆鐵壁,誕生 50 年也歷久不衰。Action Toys 此作亦用回原祖設計,圓渾線條配上黑、白、藍基礎配色,其中胸前高熱火焰更內置 LED 發光裝置,形神俱似。配件亦非常豐富,包括一對附有噴火特效的鐵甲飛拳、隱藏於腰間的腹部飛彈,以及可加裝於隻臂的大車輪鐵甲飛拳配件。玩家更可另購噴射飛翼及鋼刀飛拳,單是玩招式已經有排玩。較可惜是朋友號啤死於頭部,不能拆下獨立把玩有點美中不足。
此作售價 HK$238,仲平過砌隻塑膠 MG,可謂超級吸引,難怪甫發表已引發討論。有心買現在可到各大玩具舖落訂,唯一擔心是能否趕及 2022 第三季派貨,始終同廠 ES 合金黃金戰士等到退休都仲未見街,粉絲們科水前要諗清楚等唔等到啊!