文：本香猛
數過去最受歡迎的賽車動畫，《頭文字 D》絕對入頭三甲，主角藤原拓海的座駕 Toyota AE86 更被視為漂移神車，唔少車迷都想擁有一部。最近日本 Camshop 就幫大家「圓夢」，推出 AE86 造型紙巾盒，按比例造到真車一樣，雖然唔識甩尾，但就擺得玩得又用得！
紙巾盒尺寸 270 x 120 x 88mm，重約 658g，由 ABS、PVC、GPPS 及矽膠混合製成。由於取得講談社授權，外觀完全忠於 AE86 原車，黑白色熊貓式塗裝、身側「藤原豆腐店 自家用」字樣、彈出式頭燈、方向燈、尾燈組甚至是死氣喉一一還原。最正是車輪可以轉動，仲有埋煞車卡鉗，令它可如玩具車般前後推，絕非得個樣。
它的車身可中間拆開放紙巾，只不過內部空間唔算大，僅可容納 93 x 70 x 140mm 的紙巾套裝，常用的 Full Size 的紙巾放入後會令車身變形，也容易扯爛紙巾，廠方也建議放入濕紙巾或袋裝紙巾為佳。它現於 camshop.jp 接受預訂，連稅賣 7,700 日元，折約 HK$381，提供白色或黑色引擎蓋兩個版本選擇，預計 2025 年 1 月發貨。
