文：本香猛
LEGO 近年與任天堂關係如膠似漆，頻頻推出愛情結晶品，最經典當然是 2020 年的 71374 NES 紅白機。而睽違四年，又有一部童年回憶變成 LEGO，就是當年紅極一時的手提遊戲機 Game Boy！
新作編號為 LEGO Icons 72046 GAME BOY，積木數量唔多只有 421 塊，砌成後高 14cm、9cm 闊、3cm 深，1:1 足本還原 Game Boy 的原來大小。除了 Size 跟到足，還用了大量灰色磚，所以連顏色都似模似樣。其他細節亦似到得人驚，十字鍵、A/B 鍵、SELECT/START、電源開關、音量轉鈕、對比度調整掣、喇叭孔、電池蓋甚至遊戲卡槽等通通神還原，而且全部撳得扭得，連手感同質感都還原埋，利害！
睇一副 LEGO 出得有無誠意，最容易是看看印刷件多唔多。此作由電源「OFF-ON」，到「Nintendo GAME BOY」、「BATTERY」、「DOT MATRIX WITH STEREO SOUND」等字樣均是印刷件而非貼紙，顏色字款跟到足，無論視覺觸感都比貼紙像真好多。
有遊戲機當然要有遊戲玩，此作隨附《薩爾達傳說：織夢島》同《超級馬利奧》兩款經典遊戲卡帶，可以如實插入機體內，不過有無阻力就暫時未知。另外跟機有三塊立體光柵印刷（Lenticular）透明貼片，一款還原開機時 Nintendo 標誌由上到下緩緩降落的開機畫面，另外兩款還原以上遊戲畫面，全部綠底黑圖勁懷舊，不得不讚廠方心思。
此作預計 10 月 1 日上市，售價 US$59.99，折約 HK$470，幾百蚊買童年回憶，超值啦！美中不足是包裝太 LEGO，若然連包裝都用埋當年 Game Boy 設計就無敵喇！
LEGO 仲特登拍咗段 90 年代化宣傳片，即睇：
