文：本香猛
雖然聖誕同除夕仲未到，但 LEGO 已經「超前部署」，提早推出兩款應節農曆新年套組，分別是編號 80118 的「迎福鞭炮」及編號 80119 的「駿馬奔騰圖」，同於 2026 年 1 月 1 日上市，同大家拜過早年！
先講「迎福鞭炮」，一睇就知靈感來自炮仗，包含 1,039 個零件，高 47cm、寬 27cm、深 7cm，由大量紅色磚砌出主體部分，並點綴黃色與藍色磚，下方則是預製圓筒狀炮仗，成品似模似樣。模型還暗藏機關，首先它可以放入積木零件，搖動時發出仿真的噼啪響聲，重現真實炮仗聲效。另一個則是正面下方的特殊按鈕，按下前門即自動揭開，玩家可按需要放入兩個場景，一個是全家迎財神，一個是兩代同堂放煙花，各有特色。套裝內含 6 個人偶，包括祖父母、父母、兩名孩子及一個財神爺。
相比起起，「駿馬奔騰圖」更為龐大，也更有意景。全套有 1,650 個零件，砌成後高 23cm、寬 30cm、深 32cm，主體是四匹奔騰中的駿馬，背是是一幅駿馬印刷水墨畫布，8 隻馬加起來跟「發」同音，也呼應了 2026 年丙午馬年。另外它一樣暗藏機關，轉動模型側面的把手，馬腿便會前後擺動。兩隻人仔分別是書法家和馬頭人，據了解馬頭頭飾是全新開模的零件，此前 LEGO 僅生產過獨角獸造型頭飾，對收藏家來說極具價值。
售價方面，80118「迎福鞭炮」賣 US$89.99，折約 HK$700，而 80119「駿馬奔騰圖」則售 US$109.99，折約 HK$855。官方資料上市日期為明年 1 月 1 日，但據過往經驗，亞太地區有機會提前至今年 12 月 25 日或更早上市，香港 LEGO 迷有望聖誕節就有得玩！
