文：本香猛
Netflix 動畫《KPop 獵魔女團》唔聲唔聲成為全球動漫迷同 K-Pop 粉絲熱議神作，唔單止躋身多個地區的排名榜 Top 1，仲提名奧斯卡最佳動畫片。本地人偶廠 Hot Toys 最近攞到授權，將女團 HUNTR/X 三位成員變成 1:6 Figure。
《KPop 獵魔女團》爆紅，周邊產品陸續有來，玩具界就有 Barbie、Funko 等。HT 出慣英雄大片，今次亦唔執輸，而且落重本製作。三個成員頭雕不但全部用上可動眼球，更激罕採用雙表情設計。雙表情經常在 SHF、RAH 等出現，在 HT 作品卻十分少見，皆因要通過演員審批絕非易事，以致出來的成品往往木口木面。今次製作動畫不受此限，團家特別為玩家準備了標準與演唱兩款表情，令作品更生動多變。素體則採用矽膠無縫素體技術，以往多用來整大隻佬，原來用來整女體一樣得，官圖所見皮膚質感近乎真人，而且沒有穿崩關節，最大程度保持美感。
細節方面，團隊鎖定動畫開場神曲《How It's Done》造型落刀，三套戰袍細節多到嚇死人。例如 C 位隊長 Rumi 按比例高 28cm，紫色蠍子辮植入鐵絲，擺甫士時髮尾如跟住飄！鮮黃騎士褸釘滿鉚釘，白色高領短版上衣、短褲、項鏈、紫色繩結掛飾、厚底長靴跟足動畫設定。最正是佢把「四寅劍」，透明劍身雕滿星座符咒，金光劍柄夠晒霸氣，並送專屬鐳射應援手幅。
冷艷主舞 Mira 高 28.5cm，粉紅雙馬尾做到絲絲分明，黑色上衣印有圖案，並配有銀色肩飾、頸圈、黃色高腰裙飾、金屬鏈條、粉紅色繩結掛飾與黑色過膝長靴。武器「曲月刀」彎如新月，刀柄金鈴據說晃動時真是有聲！
鬼馬忙內 Zoey 成員中最矮，變成人偶高 27.5cm，招牌丸子雙辮俏皮到極，青綠色露腰裝配傘兵褲亦好有潮味。武器「雙組神刀」短小精悍，跟有金色流蘇可謂神還原！附送的 Awesome Diary 記事本連封面都有印刷，落足誠意製作。
三款人偶統一設有標準配件組，例如 8 款可換手、專屬麥克風、應援棒、鐳射海報，甚至……杯麵（冇錯，動畫入面真係有食杯麵場面！）。背景板用上光柵立體印刷，燈光一照即刻變演唱會現場。
小道消息指，HT 為攞 Netflix 呢個授權傾足半年，睇準《KPop 獵魔女團》全球點擊暴升兼入圍 Annie Awards，隨時帶起新一波動漫 K-Pop 收藏熱。問題是三款人偶最快 2027 年第 1 至第 2 季才出貨，到時熱潮或已減褪，加上現時 HT 無得炒，究竟現在畀錢預訂（註：Rumi：HK$1,730；Mira：HK$1,590；Zoey：HK$1,590；同時預訂可享 HK$100 優惠），還是到時買現貨，看倌就要自行決定了！
