文：本香猛
香港地，玩得起火車模型，邊個唔追求還原度？最近港鐵推出 N 比例電氣化列車（俗稱 M 車）模型，擺明要攻陷一班追求精準的本地發燒友，最正是有不同組合畀大家揀，「鐵膠」又要破財了！
所謂 N 比例，即是 1:160，屬亞洲區尤其日本同香港主流規格。對於香港這個「彈丸之地」，N Scale 最吸引莫過於慳位，就算儲齊八卡全編組，都是用一個 A4 盒仔就裝得落，比起傳統火車模型慳位好多！
講解一吓，港鐵市區線 M 車由英國製造，是港鐵載客車隊中歷史最悠久的一款電動組合列車（EMU），已經服務市民超過 45 年。列車行遍市區多條路綫，無論在地底車站或架空路段都有機會見到它的身影，這也解釋了港鐵為何挑選它成為第一款 N Scale 鐵路模型。
講番模型，雖然尺寸唔大，但細節唔馬虎，外型高度還原真 M 車，連車底機箱、轉向架、甚至小到不覺眼的部件都做到一絲不苟，展示版的頭尾燈仲要識着，齋睇都覺得有質感。
成套產品線分到好細，明顯諗過度過，想食盡不同客源。首先是 M 車車頭展示版，純展示用，配備頭尾燈效（要配合通電路軌先有燈），收藏價值同賞玩樂趣兼備，擺喺枱頭已經夠晒型！新手套裝則是 3 卡車廂連控制器，已經包埋模型、控制器及基本路軌，列車已內置摩打，配備動態功能，可加速及調換行走方向，一套齊腳即買即玩。
基本套裝則面向專業玩家，3 卡車廂包頭尾車加動力中間車，放上路軌即刻跑，適合本身有齊「架撐」的玩家即刻擴展線路。另有擴充套裝，5 卡車廂為全部中間車，無動力及駕駛室，專門配基本套裝用，湊夠 8 卡真編組，行車場面即刻還原港鐵日常，勁有滿足感。
售價方面，M 車車頭展示版賣 HK$250；新手套裝賣 HK$1,380；基本套裝賣 HK$980；擴充套裝賣 HK$1,198。預算多些可買套裝，例如新手套裝搭擴充組售 HK$2,500／套，而基本組連擴充組則售 HK$ 2,110／套。模型即日至 2026 年 4 月 30 日於 MTR e-Store（網上及門市）接受預購，預計 2026 年 7 月起陸續發貨。
