文：本香猛
各位「巨人迷」準備好「獻出銀包」未？動漫神作 進擊的巨人 雖然一早完結，但玩具商、製片商撈金腳步從沒停過。日本 BANDAI SPIRITS 旗下、專門等一眾信徒「抽盲盒」試運氣的「一番賞」系列，近日又宣布推出新商品「進擊的巨人～獻出心臟吧～」，其中最後一賞超吸引，就算獻出心臟都要買到！
今次個陣容，笨大好識玩，A 至 E 賞清一色出 MASTERLISE 系列，擺明車馬以高質素吸引玩家。五位主角，包括艾連．葉卡、米卡莎．阿卡曼、阿爾敏．亞魯雷特、艾爾文．史密斯同埋漢吉．佐耶，通通還原第一季造型，着住件兵團「制服」敬禮。老實講，呢個 Pose 夠晒經典，一字排開放在屋企神枱位，論氣勢已經贏晒。笨大今次細節更是交足功課，不但雕工標榜精緻，連調查兵團套制服上的皮帶皺摺及背脊塊「自由之翼」也印得有板有眼。
而最受注目的最後一賞，則是里維．阿卡曼「里維～人類最強士兵～」。這款以兵長里維在牆外調查時的騎馬造型打造，披風隨風飄揚的動態感處理得十分自然，腰間立體機動裝置的細節亦刻劃入微，配上神駿黑馬，整體散發出強大壓迫感，完美呈現「人類最強」的氣場。
此一番賞預計今年 10 月 24 日正式開售，每抽盛惠 850 円。你話貴唔貴？以家陣匯率計，折合埋 HK$42 左右，算是正賞價。不過想得到最後一賞，就要買下抽獎券的最後一張，不靠運氣純靠「全包」財力及眼光，想入手要量力而為啊！
