有關買賣平台經常出現空頭支票騙案造成損失



今時今日大家主要用 FPS/ALIPAY/PAYME/WECHAT PAY/OCTOPUS
但支票對好多人黎講係真係唔識用，大家真係用唔著，生活上大部分情景亦用唔到

空頭支票騙案長期枕住出現各買賣平台，係因為大家唔知騙徒係用空頭支票篤假數俾你，亦唔清楚支票詳細用法及運作係點用，支票由銀行正式開始處理前，已經有一大漏洞，就係將一張未知係咪真係正確無誤成功兌現到既支票處理前，已經會先將你存款總數加左先 （依個就係漏洞，一個假象你以為對方入左數，如果你唔識支票係咁，亦唔會睇可用結餘），銀行界一路以來都唔肯修補依個漏洞，幾樣野加埋造成

支票黨同你溝通過程當中，只會同你講佢會用網上理財過數俾你，完全無提過支票兩個字

其他唔識支票用法既師兄師姐請聽住，當有人聲稱已過數俾你後，你一定要即時檢查你銀行賬戶下面

（1）存款總數
（2）可用結餘

兩個銀碼，必須要一齊相應增加
兩個銀碼，必須要一齊相應增加
兩個銀碼，必須要一齊相應增加
重要既野講三次

一般你使用自己賬戶，你過數俾你認識既人，或你認識既人過數俾你，因為佢同你大家認識，唔會呃大家，過完數後，上面兩個數值，一定係齊加或齊減，數值完全一樣，你平時唔覺有乜野異樣

但如果涉及到有陌生人過數俾你後，你見到只有存款總數加左，而可用結餘係無相應增加，咁既情況請即時打醒十二分精神，萬萬不可將物品交俾接收既人，99.9999% 係支票黨正以無效支票篤左一次假數，嘗試誤導一下你，佢地就係博你嗰下，你識唔識支票運作同你信唔信收到真錢既精神意志

一定係，除非唔係

另外，較大件較貴重既物品，佢地多數都願意出黎面交，但係臨交收之前話臨時唔得閒，搵家人，朋友等等黎代交收，跟你面交嗰位係跑腿黎，99.9999%係暑期工，學生兼職等等，係騙徒既替身黎，唔係騙徒真人，跑腿自己犯緊法串謀行騙自己都唔知頭唔知路，如果已有前受害者報左案警察做緊野，同受害人夾好再去相約交收，現場有警察埋伏出黎拉到個跑腿就成為死士

另外，騙徒過空數俾你既銀行賬戶，都唔係屬於騙徒自己，係租或買其他正當人既賬戶黎做行騙，即係傀儡戶口，持有人會俾警察拉 （串謀詐騙及洗黑錢），所以唔好出租或賣自己銀行賬戶俾任何人

買賣平台管理員人手及權責有限，能夠出手既野亦好有限，有騙案發生管理員唔想見到，亦愛莫能助，只可靠大家守望相助，希望幫到大家，要記住以上重點，一齊防騙