新聞互動
續上回,一行五人睇完鯨魚後,駕車沿路駛向冰島北部另一主要城市Akureyri途中,在公路上遇上翻車意外!
我出海觀鯨後有小小眼訓,上車一陣就訓著咗,冇幾耐,突然感到一下大力搖晃,當眼睛張開的一剎那,車已失控drift打緊白鴿轉!驚魂未定,感覺車已經凌空翻轉,從車窗望岀去個地平線係斜成45度!過一秒後不知撞擊了什麼,然後整個人已經被泥水浸著。
當時發覺自己仍然清醒後,就先把朋友救出,再將插在水氹(望落似一條小河的長條型水氹)中的車身翻返正。
公路上經過的途人見到情況都幫手救援,其中更有一位印度醫生,他立刻為各人檢查及做保暖工作。
眼見個相機袋已經totally濕曬,就即刻睇下個iPhone影唔影到相,然後就用車禍當事人身份去紀錄這場車禍。
影咗多年新聞攝影,估唔到會有一次係"自己炒車自己影"嘅經歷,這之後對我的攝影體會都有唔少影響。
之後五人即時送院治理,當局安排了Hostel給我們暫住,待了兩天後,我們再繼續那還剩下1/4個冰島的環島旅程,不過不再是自駕了,而是坐巴士,兩日後返回首都雷克雅未克(Reykjavik)。