文：joEjoE
八、九十年代本田思域俾人認為係「飛仔車」的形象可算得上深入民心，當年旺角街頭一街都係大踢 (VTEC)，架架車的標準配備基本上都係下巴擾流加尾翼，各有自我的型格。又或者好多人會覺得改到鬼五馬六啦，只因當時香港引入的車款同日本版好唔同，為左突顯個人品味，搞到架車惡型惡相又有，外型斯文內裡兇悍既為數亦不少。
早前驚見日內瓦車展新一代掀背思域 Prototype 出台，原來不經不覺思域己發展到第十代。新一代思域外型設計比之前更討好，整體線條流露著自信及充滿挑釁性的外表。當然挑釁性冇統一標準啦，有人會認為 2015 CIVIC TYRE R 先係好挑釁，但筆者個人就認為背住大尾翼的 CIVIC TYPE R 堅係「惡」啦，仲使乜挑釁你丫。
根據本田官網報導，呢款掀背思域只限在歐洲地區先行發售，將配置全新設計引擎其中一台係 1 公升直三 Turbo 引擎，另一台係 1.5 公升直四自然吸氣引擎。在歐洲開賣的主要係六前速手波版本，另外都有 CVT 無段變速自動波可以選擇。
不過玩得思域的朋友點都會較為期待六速手波版啦，新一代五門掀背思域預計會在 2017 年在歐洲地區開賣，但係日本版及亞洲其他地區唔知會唔會有五門掀背版本，搞到香港地區更加可能會見唔到呢款思域周街行。不過睇落外型咁鬼靚仔，希望香港代理努力及識做啦。
如果而家仲有人覺得思域係飛仔車，相信睇完上面既圖片之後隨即要檢討下喇，哈哈。
圖:world.honda.com
查詢︰2827 8622
