港人必到！LEGO Store 本土味濃

發表於 2016 年 8 月 21 日 • 瀏覽 18,359 •生活品味

文：本香猛

香港勁多 LEGO 迷，新貨一出，多半賣斷，停產又幾乎必升，攪到玩 LEGO 變成畀 LEGO 玩！不過自從香港首間認證 LEGO Store 日前於旺角朗豪坊正式開幕，從此大貨有穩定供應，以後買 LEGO 應該唔使再食炒了！

LEGO Store 佔地超過 4,000 呎，夠晒闊落，白撞黃配色仲睇落好舒服。

一米高巨型紅色 2x4 積木放正在門門，夠晒 Eye Catching！

旺角街景用了超過 70 萬積木砌成，街坊有無找到熟悉影子？

講番間舖，佔地逾 4,000 呎，店面設計由樂高集團負責，以黃、白雙色作主色調，正門旁放有象徵品牌標誌的 1 米高經典2x4紅色巨型積木，無需看招牌，就知它是 LEGO 專門店。話晒「紮根」香港，店內不少陳設均別具本土情懷，例如以超過 10 萬粒積木砌成、尺寸為 9.9 呎x 11.2 呎的維港景色馬賽克畫，以及由樂高認證專業大師洪子健及拍檔 Alex Hui 合作砌成的旺角場景模型。當中旺角場景就用了超過 70 萬粒積木、8 個月時間砌成，將亞皆老街到山東街一段的彌敦道、西洋菜街和砵蘭街呈現出來，單是這份心思就值得大家入場朝聖。

街景有大量 Minifigure，同旺角一樣咁熱鬧！

LEGO mosaic wall，用 10 萬粒積木砌成維港景色，靚到成張相咁！

香港首條 DUPLO 裝飾柱，主題橫跨南北兩極，中間是森林動物，保證小朋友睇到唔眨眼。

除此之外，場內還有不少 Check Point 值得駐足觀看，例如大門左方有一條用 DUPLO 積木砌成的動物主題裝飾柱，主題橫跨南北兩極，中間部份是森林動物，細路實睇到唔眨眼！另外又有「Build-A-Mini」專區，玩家可自組 Minifigure 的身體、配件及表情，三隻 Minifigures 都係誠惠 HK$99，抵過山寨貨！最後仲有「Pick-A-Brick」積木牆，牆上有超過一百個圓型櫃桶，每個放置不同零件，LEGO 迷可按需要把零件放入膠杯帶回家中，唔使成盒買，慳番唔少錢！

任砌 Minifigure，三隻 Minifigures 共售HK$99。

Pick-A-Brick 積木牆，一百個圓型櫃桶放置了不同的顏色零件。

顧客可把 LEGO 放入透明杯內帶回屋企，小杯售HK$119，大杯售 HK$199。

開幕期間，店內有大大小小不同優惠，由即日至8月22日買滿 HK$1,888 或以上，即可換領限量版 box set（#40145，非賣品）一盒。而凡於 9 月 30 日或之前購滿 HK$818 或以上，則可獲得神秘禮品一份，包括 Year of Monkey（#40207，非賣品）、指定 box set（價錢由 HK$99 至 HK$149）、Pick-A-Brick（小杯裝，價值 HK$119）及 Build-A-Mini（價值 HK$99）等等，總共過千份禮品。特別一提，場內還設刻字服務，購物滿 HK$500 或以上就可免費刻字一次，優惠至 8 月 31 日，巴打想用來傳情達意，就要快手了！