文：本香猛
「侵侵」Donald Trump 終於宣誓成為美國第 45 任總統，姑勿論閣下 Like 唔 Like 佢，他必定是歷屆總統中最具話題性。侮辱女性、針對穆斯林，又對周邊國家多番批評，得罪人多稱呼人少，偏偏佢卻「排除萬難」成功當選，人氣之高，連去年《時代雜誌》都要選他為年度封雲人物。
如此具 Talking Point，周邊產品當然多籮籮，T 裇、徽章、香水、餅乾模具、衛生紙、面具，諗得到的都有。而最近人偶廠 DID Corporation 亦打其主意，宣布推出 1:6 Donald Trump 紀念人偶，無論是敵是友，都應該買番個回來盡情「把玩」！
以二戰人偶成名的 DID 並非第一次製作政治人物，舊作就包括前美國總統奧巴馬、俄羅期總統普京、前英國首相邱吉爾等等，今次製作「侵侵」，自然手到拿來。頭雕維持廠商一貫質素，五官、下墜皮膚、皺紋、雙下巴等都具一定神似度，並附有雙頭雕，一款是正經 Look，略嫌木口木面。另一款則是演講 Look，「O 嘴」兼露齒，一款「寸寸貢」模樣，極具真人神髓。美中不足是頭髮整齊平伏過龍，若能改用植髮，就能還原其招牌粟米鬚髮形了！
DID 服裝一向高水準，今次亦不例外，隨 Figure 附有黑色西裝一套，修身貼合如真衫，左領位置扣有國國旗襟章，並配有紅、藍色領呔各一條，以及鞋、襪及白裇衫等。另外競選期間經常出現的「Make America Great Again」口號紅色帽子，這裡都送埋畀你。其他配件還包括咪高峰、咪架、兩個紙製演講台、背景版等，再加上「侵侵」的四款經典手型，包括蘭花手 OK、手指指、直豎姆指及手掌大開，組合起來實在叫人忍俊不禁！
Figure 現正接受預訂，零售價為 US$99.99（約 HK$775），預計今年四月底發售。
