文：Tony Lam
若然閣下自認車迷、車癡、車乜都好，從來都係唔使睇齋聽聲都聽得出 3 公里外有部穿咗死氣喉嘅貨車嚟緊嘅話，恭喜你，呢個遊戲實在好啱你玩，先睇第一張相，十秒內估得到呢部炒到化灰嘅係咩車，我會叫聲你車神，不過估中無獎。
估唔到？咁就睇答案啦（最尾張相）！唔係掛？睇埋第二張都唔知，咁你就唔好同人講你鍾意車，你好識車熟車啦…不過呢，我都係唔會講個答案你知住，睇埋單意外係點發生先。
據報導指，意外發生於上星期日上午，地點為離開倫敦市 176 公里嘅特羅布里奇小鎮旁一條郷間小路，意外發生經過無講，只知道此車撞向鎮上其中一間屋，衝力之大令到屋外牆亦散晒，最恐怖嘅係撞完後部車更著火燒成灰，幸好被撞嘅屋以磗及水泥打造，沒有被火波及，否則損失更為慘重。
不幸中之大幸嘅係車上司機及乘客及時逃離車廂，只受了輕傷，而屋內亦沒有人受傷，最傷只係部車，真正 Total Loss 莫過於此，連渣都無（都唔係，都仲有隻鈴可以留念）！惟一希望單意外唔係車主自己人為，保險有得賠啦，如果唔係都真係好肉赤，點解？咁我惟有開估，因為撞咗嘅係部 Mclaren 570S（熟車嘅話睇張相見到條鈴就已經估到），賣成 $143,250 英磅（香港賣 $3,200,000 起）㗎陰公！
來源：motor1
