文：Stephen
雖然劉德華為政府拍攝宣傳片時都有講過「今時今日咁嘅服務態度係唔夠嫁...」，但是香港人向來出名「難服侍」，「Complain、Complain、Complain…」又不絕於耳，更被網民譏稱香港早已經成為「投訴之都」！屬於服務業一份子的婚禮攝影師可謂感同身受，因婚禮攝影師工作性質特殊，常常需要與準新人交流，加上「攝影藝術」的解讀方式因人而異，故有少部分準新人會因拍攝服務或質素問題而與攝影師隔空「開火」。而日前在網絡上就流傳多張由新人「評審」攝影師拍攝質素的「標準答案」，一眾網民看到長達三十多頁的「溫馨提示」，令人感慨「搵食艱難」。
構圖、曝光確實未完美
話說有位攝影師接了一個 Big Day 的工作，不過當他將照片傳予新人之後，新人似乎不太滿意攝影師的拍攝質素，因為新人居然「細心地」為每張相片留下評語，並以標準的「九宮格」構圖方法點出拍攝不足的地方。至於部分相片因背景「閃得太爆」，令新人部分名字「被消失」亦被新人鬧爆！雖然在 Facebook
內為攝影師「抱不平」的樓主並沒有交代這輯相片有沒有做過 Retouching，但是貼文的樓主與網友對於新人今次的「處事方法」都頗有意見。畢竟如果相片沒有任何 Retouching，攝影師有時會在構圖上預留裁相的「緩衝地帶」，留待日後編修相片之用，若此時新人真的嚷著要求攝影師傳遞「原相」，很多時會因這些在構圖上的「穿崩位」而覺得「篤眼篤鼻」，因而大興問罪之師。
新人處理手法可圈可點
有網友就覺得雖然新人指出的構圖（按：大多為左右不對稱）確實有不妥的地方，的確有可以改進的空間，但用上三十多頁的 PDF 文件傳予有關的攝影師就似乎相當有「鞭屍」之感。另外，亦有人覺得婚禮拍攝向來是「銀紙先決」，預算較多自然可以找到好一點的拍攝組合，像是次有傳「2P1V 只有一萬頭」的
Package，雖然不屬「爛做價」，但很難以「碗仔翅的價錢得到真正魚翅的品質」。亦有眼利的網友「突破盲點」，道出新人的婚宴場地本身亦是地方淺窄，亦非是開揚的大禮堂，攝影師要「（拍攝數目）多、（拍攝夠爽）快、（質素）好、省（金錢）」地拍攝出驚世作品實在有一定的難度，更揶揄「點解新人唔自己影？」、「…下次攝影師不妨另拍 360VR 片，到時可以無死角任睇…」。
網友有話說
‧「.....個 X 街做測量師㗎......好似成份報告準備上庭咁......」
‧「如果有齊所有 pdf 檔比大家睇就好，聽聞當晚 Snap Shot得果 118 張....唔知真假....我唔係專家，都係當食下花生充飢算....」
‧「其實最多挑剔既就係香港人」
‧「啲相係唔掂，但要個攝影師有幾衰，先會令對新人做出啲咁癲既野」
‧「好 X 癲咼，其實 d 相問題都唔算好嚴重，如果每張跟足佢所以要求唔係唔得，但你個婚禮有無時間俾佢慢慢度先？」
‧「單 job 出 2 攝 1 video 價錢萬頭左右，極品 LH」
‧「陰公，睇過咁多結婚相，呢個最專業……仲專業過人地執相個 d 丫」
‧「個景咁寒酸既……麥當勞生日會塊 banner 仲有氣勢」
來源：Facebook
