文：Tony Lam
新一代 BMW M5 推出後迴響可真唔少，唔少人見到新車變身四驅後即時耍手擰頭，認為破壞了 M 車應有玩味，又話尾驅才是正宗芸芸，其實呢，大家不如睇埋呢條片先下定論啦。
新一代 BMW M5 正式推出後，規格之強絕對係歷代之冠，一台 4.4 公升 V8 雙渦輪增壓機器可發出 600 匹最大馬力及750 Nm 扭力！8 前速自動波加上四驅系統，由靜止加速至 100 公里只要 3.4 秒，0-200 km/h 亦只需 11.1 秒攪掂，平常極速限制為 250 km/h，若選配 M Driver’s Package 套件的話，可以去到 305 km/h。單睇數字已是超跑級數，不過，最叫車迷討論的莫過於四驅一環，其實新車可以自由轉換 4WD、4WD Sport 或純後驅，更加可以熄埋 DSC 車身動態穩定系統，等你盡情 Fing 盡情甩尾，M 車好玩傳統絕對保留，唔信就自己睇片睇吓部車有幾好玩。
