文:本香猛
龍珠萬變卡、Yes!明星卡,80、90 後如你和我一定抽過。為紀念萬變卡創立 30 周年,Bandai 早前不但重推萬變卡,近日更發表「Carddass 30 週年紀念」迷你扭卡機,等大家帶返屋企大扭特扭!
回想當年,萬變卡(日本名為 Carddass)是日本 Bandai 推出的集玩卡,當年港紙 $1 抽 1 張,在超市、文具店總找到一部。由於抽數十張才有可能抽到 1 張限定閃卡,唔少學生為求抽到可以連飯都唔食,本香猛就是其中之一。據知萬變卡在最高峰期,總累積銷量超過 14 億張,抽卡機更多達 10 萬多台。然而,隨著山寨機不斷,加上人氣被電子遊戲趕過,萬變卡在 1999 年推出第 32 彈就無而為繼;直至去年《龍珠超》鹹魚翻生,Bandai 才再推第 33/34 彈以配合宣傳,但兩輯均以 Boxset 直接發售,始終少了一份抽卡感覺。
新推的「Carddass 30 週年紀念」迷你扭卡機就為此而生,它是繼 2016 年的家用扭蛋機後,Bandai 再將以往的自動販售機以縮少形式量產發售。話明迷你版,這部抽卡機只有 180mm 高、110mm 闊、110mm 深,全白造型右側設有銀色轉鈕,後方設有卡槽以放置萬變卡,玩家可循環使用 2 枚 10 円硬幣來扭出卡牌。最傳神是扭卡時會如昔日般發出「咔咔」聲,卡片又會慢慢逐格彈出,保證能勾起大家童年回憶。當然,若果連「扭半格」這小技巧都用得番,就更加 Perfect 了!
有機當然要有卡,隨機有 10 張測試白卡,而同期 Bandai 還會推出四款 30 周年紀念版 Carddass 卡牌,當中包括《龍珠》及《SD 高達》系列,各套含 32 張閃卡及 5 張機頭紙,並附送迷你抽卡機專用的裝飾貼紙多張。售價方面,全稱為「30 周年記念カードダスミニ自販機」的扭卡機賣 6,480 円一部,即日至 2018 年 6 月 25 日接受訂購,最快今年 8 月發貨,而 Carddass 卡牌則每套售 4,104円。