文：本香猛
電影《死侍與狼人》即將上畫，Marvel 宣傳浪接浪，作為「好拍檔」的 Hot Toys 亦幫手造勢，除了推出 1:6 Action Figure 外，更激罕打造 1:1 等身原大雕像，Size 同價錢都同樣驚人，相信只有古天樂等玩家先買得起！
Hot Toys 製作 1:1 原大雕像不是新鮮事，但以往多用作展覽用途，鮮有公開發售。今次特別製作死侍及狼人 1:1 原大雕像，除足見廠方重視程度，某程度亦算是試水溫之作，為日後開設新產品線舖路。
先看死侍，全個高達 2.2 米，運用人手頂級塗裝著色工藝打造招牌紅黑緊身戰服，細膩入微的雕刻媲美原版戲服，剪裁比例、紋理質感與舊化效果都似模似樣。死侍本身火力強勁，雕像跟到足，隨附裝備腰帶、Desert Eagle 手槍、匕首、背上交叉型刀套等武器，同時手握兩把日本刀，蓄勢待發狀氣勢逼人！
再看狼人，高度也達 2.1 米，穿上經典的黃藍緊身戰服，配以黑色條紋和富有金屬色澤的護甲作點綴，加上超寫實的舊化痕跡，跟戲服沒有兩樣。他的動作較死侍靜態，筆直站立左手舉起金剛爪，如角色般含蓄中見殺氣。頭雕方面，這裡以面罩 Look 示人，雖然未見全貌，但下半臉的輪廓、皮膚及鬍鬚都有還原過來，宛如真人一樣。
兩款雕像都配有專用地台，藉此塑造瓦礫戰場情景，為作品增添氛圍。作品如此巨型售價當然不菲，死侍預訂價 HK$98,000，狼人預訂價更要 HK$108,000，財力夠更可入手「狼死套裝」，買齊兩隻承惠 HK$195,000，貴過部車堪稱天價玩具。想買的話即日起可經 Hot Toys 香港專門店預訂，根據訂單日期起，製作需 3 至 6 個月，比 1:6 Figure 更快有貨攞！
