伊朗獨行7th沙漠篇 - 滑沙鹽湖好梳乎

行程第5日亦係我最重點既一日，係期待已久既沙漠之旅呀!!!!!
講真ar，咁大個仔見過最多沙既地方竟然係大浪西灣真係有d失敗!
果陣係歐洲無沙漠之餘d沙灘又全部係石舂插腳既，所以對真正走進沙漠做沙漠之虎一向期待期待!
其實係Varzaneh去沙漠非常簡單，因為佢同鎮上只相距約10公里，跑既話世界紀錄都係26分鐘攪掂，快過外賣pizza!
而根據自己係渣打馬拉松爬過既經驗，10k的話架11號車兩個鐘內點都arrival的! 所以真係有唔少背包客真係選擇行路去沙漠
至於我，sorry第一次去，都係跟團好d
一早7點幾起身時黑大叔識英文既brother岩岩返到，傾掂數後食完早餐就出發~
ee……..成間guest house得我一個去ge……..唉private tour就private tour la，總之就成功起行啦!!!!!

有趣地，負責渣車暨導遊既係另一位素未某面兼唔識英文既本地叔叔，即係我算係包個司機車我去咁解………..
需知道「導遊」同「司機」不論文字上同性質上都係有分別的，我要豬柳強但比左好味d又健康d既煙肉強我都會唔高興呢
無計，唯有當係無人煩住我欣賞沿途風光啦~

約半個鐘後，我終於到達真真正正既沙漠範圍啦!!!!!!!!
放眼四周都係一浪一浪的沙丘山脈，環滁皆山也，最高點目測大約有7-8層樓高，除泥黃外無一點雜色，同香港海灘呢度一罐楊協成果度一包維他奶絕對係兩回事!
Varzaneh沙漠最大特點就係沙層鬆軟，非常鬆軟! 每一腳踏上去都好似踩住梳乎里咁! 又暖又軟非常舒服，一d都唔”吉”腳~

我阿爸睇到我張相後即刻話我做咩咁危險唔著鞋赤腳上，沙漠係有超級多蛇蟲鼠蟻蝎子蜈蚣………….
但我想講開頭我都著鞋的，但司機叔又得登叫我著除左佢wor，而我見另一班外國人都同樣赤腳走天涯，便照做了
而家諗返……其實都真係有d恐怖………
係果個moment，好明顯我就lai到沙漠開心得滯high上腦，鐵腿水上飄咁衝左上大沙丘啦~~~~~~~~~
但……但原來…………我頂………..頂唔住……………………………..跑沙丘………….上一步退半步………..好Q辛苦ar………..……….

(好不容易先見到個頂………..)

難得上到lai，襯其他遊客未落山梗係捉住佢地幫手影返一輪相先啦~
係山頂望下四周，四野茫茫風沙似浪，大漠沙如雪，呢度完全就係幻想中既果種「除左沙乜都無」既完美沙漠!
站在沙丘之顛，再感受下沙漠千里無人萬里廣闊的宏大氣勢…….. wei我feel到阿蝎子王同佢班靚衝緊出lai同雲迪素一齊飛車ar!

係沙漠唔滑沙點得呢~係時候lai個飛奔大漠中啦!!!
只見阿鋒拋出滑板，右腳發力，一躍而起，lai個翻騰三周半曲體，半空中雙腳貼著滑板順勢落地向下衝~猶如魔動王中拉比滑浪衝向水捲俠的駕駛倉一樣，秀髮在空中飄揚，衣衫窸窣，說不出的風流瀟灑----------------左兩秒鐘，停左，唔郁，that’s it
……………………………………………………………..
Wei我有無咁水皮ar!!!!!????????

非常瘀皮咁行返落沙丘，上車向下個地點鹽湖進發啦~
一聽到鹽湖，我第一時間諗起 : 鹽湖---> 鹽湖城---> 猶他爵士隊---> 「郵差」卡爾馬龍史托頓!
Wei…………………..作為一個旅行人，唔係應該 : 鹽湖--->玻利維亞--->天空之鏡!??
咁爽!!!!!??????伊朗都係有天空之鏡!!!????????
於是我懷著興奮既心情------------懷左5分鐘，望到呢度泥啡色岩石狀既鹽湖，收皮了

又未絕望哂ge，呢個大鹽湖似乎有for business，鹽商為左開採就將泥鹽狀的地面剷去，露出下層雪白瑩亮的鹽結晶~當地下水湧出，就成為左鹽湖啦~~~~~~~
其實應該叫鹽池岩d，因為個size同九龍公園游泳池真係差唔多……..
Hey唔理咁多啦~
雖然個鹽湖真係流流地，同大家心目中既印象相差甚遠，不過話哂第一次見面，就好似細個第一次食ge壽司even係百佳牌，都總會覺得唔錯的~

之後司機叔連埋其他岩岩識既外國tour一齊帶左我去一條村落既拜火教廟
可惜既係言語繼續不通，其他tour既導遊又對呢處所知有限，係唔知頭唔知路唔知呢個地方有乜用有乜咁特別既情況下，得個行字再影兩張相就算了!

正常lai講，我個private tour係到呢度為止的，但既然係private，咁當然係我想點就點ga la~
多謝法國家庭的tour guide幫我翻譯，總算比司機叔佢知道我想去玩多次滑沙~
梗係啦!
一次，仲要係咁失敗既一次! 我點可能收貨!
於是司機叔車左我去一個幾多人，似係「開發中的沙漠的樂園」既地方，用英文單字問我「Car?」我望望佢眼神中既沙漠四驅車，搖搖頭
「Cable Car?」搖頭 ; 「Camel?」搖頭
我諗住佢話話「Girl?」我就點頭ga la，可惜佢無，取而代之係一堆波斯語連珠爆發…………
今次真係完全get唔到佢講咩la…….玩左5分鐘超級無敵大電視，終於有個女學生極好人主動出口幫我地做翻譯!
原來司機叔話要返屋企食飯，問我介唔介意佢一個鐘後先返lai車我
咁反正我都係自己玩時佢on居居齋等je，無所謂啦大家好做~
驚唔驚佢走左去唔返lai我要做沙漠孤兒仔?
我又真係無驚過wor，一來伊朗人友善helpful，二來我都未比錢~佢走左去佢大鑊d~
好啦可以係呢個廣闊既沙漠任玩粒幾鐘ar~即刻又衝上沙丘上先啦!!!
但今次都係一樣咁喘氣………….仲高過岩岩果座ar……….

估唔到，只係行到頂已經用左差不多廿分鐘，真心攰到嘔，完全再無意慾sir落去再行多轉上lai!
咁………..仲有成粒鐘……….我係呢個廣闊既風沙堆中有咩做呢…………….
假如閣下有睇過銀魂，應該好清楚係一個無人既地方可以做d乜~
咪傻~~~~~~~~~~~~~~~我港女自拍好過~~~~~~

話咁快一粒鐘過去，司機叔又真係準時2點wor!
今次可以堅滑落去啦!
經過岩岩研究完一大輪點滑，今次鐵腿水上飄應該無得輸la掛~~~~
手腳並用划艇式加速後，當然係乘風破浪好soft啦~~
果種俯衝而下既速度感同對滑板既駕馭感，會令妳覺得「ee滑沙又真係幾好玩wor~~~」
而且沙堆鬆軟，所以跌倒都唔會痛，亦唔會好似滑雪咁一失手就唔知跣左去邊度，非常推薦比想試玩呢類野但又唔夠膽既朋友ar~
咁玩一轉滑沙幾錢?
唔知wor~ tour包埋，司機叔只係比塊板我自己三國無雙乜都無講~而家肯滑落去比返佢咪算係咁~
不過……….點解滑到一半又停左ge……….. 同我既體重一d關係都無! 絕對無! 一定無!

就係咁，係Varzaneh既沙漠+鹽湖tour完結，玩左成朝，時間唔長，但都真係幾開心幾盡興~
原本我仲要去附近既black mountain 睇動物的，但唔知點解識英文果個屋主又失左縱………..
算啦，當係民宿休息下叉下電，希望今晚既活動可以順利進行…….
有睇我facebook page既朋友都知我去邊啦!~絕對係成個伊朗獨行最正既事!
下回! 繼續沙漠篇~

====================

Email : funggarcia@gmail.com

Instagram : https://www.instagram.com/fung_garcia/

My Facebook Page : www.facebook.com/Garcia.in.Germany



另外文章同時刊於UBlog、 DC Fever Travel、 Blogspot 及遊牧爆谷
請各位繼續多多支持呀!!!!!!!!!!!!!!!

更多伊朗旅遊攝影資訊